Այսօր Հայաստանում ԵՄ պատվիրակության ղեկավար Պյոտր Սվիտալսկին ասուլիս էր հրավիրել, որի ժամանակ անդրադարձավ նաեւ Հայաստանում Սահմանադրական փոփոխություններին:
Հարցին՝ ի՞նչ կտան այդ փոփոխությունները մեր երկրին՝ դեսպանը պատասխանեց. «Մենք ուզում ենք, որ դա լինի արդարացի, որ փոփոխությունների կողմնակիցները կարողանան ազատ արտահայտել իրենց կարծիքը եւ նրանք, ովքեր դեմ են, նրանց նույնպես հնարավորություն տրվի, որ ազատ արտահայտեն իրենց տեսակետը: Հուսով եմ, որ դեկտեմբերի 6-ին քվեարկության գործընթացը կկազմակերպվի եվրոպական չափանիշերին համապատասխան: Հուսով ենք, որ կլինեն տեսանելի դիտորդական ֆունկցիաներ»:
Նա հիշեցրեց, որ դիտորդական առաքելություն իրականացնում է ԵԱՀԿ/ԺՀՄԻԳ-ի կողմից. «Ուզում ենք, որ հայերը իրենց ընտրությունը կատարեն՝ տեղեկացված լինելով: Նշաձողը, որի նկատմամբ մենք կգնահատենք արդյունքները, կլինի, թե ինչպես այնուհետեւ կփոխվի Ընտրական օրենսգիրքը: Դրա համար ես կառաջարկեմ, որ ձեր հարցը կրկնեք ապրիլի վերջին, այն ժամանակ ես կասեմ, թե ինչ եմ ես մտածում»:
Հռիփսիմե ՋԵԲԵՋՅԱՆ
