Արամ Խաչատրյանի տուն-թանգարանում այսօր մեծանուն կոմպոզիտորի անվան միջազգային փառատոնի հյուրերն էին աուտիզմ ունեցող երեխաները։ Նրանց համար ներկայացվեց «Հույսի երաժշտություն» համերգային ծրագիրը: «Հայաստանի պետական երիտասարդական նվագախումբ» ՊՈԱԿ-ի տնօրեն Սարգիս Բալբաբյանը Aravot.am-ի հետ զրույցում նշեց, որ Չայկովսկու անվան երաժշտական դպրոցի աշակերտները կատարել են հատվածներ Խաչատրյանի մանկական ալբոմներից:
Կարդացեք նաև
«Այսպիսի համերգներով ցանկանում ենք աուտիզմ ունեցող երեխաների համար եւս ստեղծել այնպիսի պայմաններ, որպեսզի նրանք իրենց լիարժեք զգան եւ մոտ լինեն դասական արվեստին: Մինչ համերգը Արամ Խաչատրյանի տուն թանգարանում կազմակերպել ենք ցուցադրություն: Երեխաները ծանոթացել են թանգարանին եւ Խաչատրյանի գործունեությանը: Նրանց համար բավականին հետաքրքիր էր շրջայցից հետո լսել Խաչատրյանի ստեղծագործությունները»,-ասաց Սարգիս Բալբաբյանը:
Նրա խոսքով՝ կարեւոր է վաղ տարիքից երեխաների շրջանում դասական երաժշտության հենդեպ հետաքրքրության սերմանումը. «Փորձում ենք անել հնարավորը, որպեսզի դպրոցական տարիքից երեխաները սիրեն դասական երաժշտությունը»:
Նշենք, որ համերգի մասնակից երեխաները «Նվիրիր կյանք» հիմնադրամի շահառուներն են: Ավելի վաղ եւս նրանց համար դասական երաժշտության համերգ էր կազմակերպվել: Արամ Խաչատրյանի անվան 3-րդ միջազգային փառատոնն անցկացվում է հոկտեմբերի 3-ից դեկտեմբերի 5-ը՝ Հայաստանի պետական երիտասարդական նվագախմբի նախաձեռնությամբ:
Լուիզա ՍՈՒՔԻԱՍՅԱՆ
