Ազգային ժողովի պատգամավոր Տիգրան Ուրիխանյանի օրենսդրական նախաձեռնությունը կառավարությունը կմերժի:
Վաղը կառավարության նիստի օրակարգում է ներառված պատգամավորի՝ «ՀՀ ընտրական օրենսգրքում լրացում կատարելու մասին» եւ «ՀՀ օրհներգի մասին» օրենքում լրացում կատարելու մասին նախագծերի փաթեթը:
Ուրիխանյանն իր օրենսդրական նախաձեռնությամբ առաջարկում է Հայաստանի ողջ տարածքում համապետական ընտրությունների ժամանակ տեղամասային կենտրոնների բացումը եւ փակումը ազդարարել Հայաստանի Հանրապետության օրհներգով, ինչը կառավարության սրտով չէ:
Կառավարությունն իր մերժումը հիմնավորում է այն հանգամանքով, որ նախագծից պարզ չէ, թե որ պահից են տեղամասային կենտրոնները համարվում բացված եւ փակված, օրենսդրական տեխնիկայի կանոնները մասամբ պահպանված չեն: Կառավարությունը գտնում է, որ նախագծերի դրույթները համադրելի չեն «Հայաստանի Հանրապետության օրհներգի մասին» ՀՀ օրենքի 3-րդ հոդվածի 1-ին մասի դրույթների հետ, մասնավորապես՝ ՀՀ օրհներգը պարտադիր կատարվում է ՀՀ նախագահի, Ազգային ժողովի նախագահի, վարչապետի մասնակցությամբ պաշտոնական եւ հանդիսավոր արարողությունների ժամանակ, օտարերկրյա պետությունների նախագահների, օրենսդիր մարմինների ղեկավարների, վարչապետների, պաշտոնական ներկայացուցիչների ՀՀ պետական եւ պաշտոնական այցերի ժամանակ, Հայաստանի տարածքում անցկացվող զորահանդեսների ժամանակ եւ այլն. «Մինչդեռ նախագծի համաձայն՝ օրհներգը պետք է պարտադիր կատարվի տեղամասային կենտրոններում, որտեղ ներկա են գտնվում միայն տեղամասային հանձնաժողովի անդամները, վստահված անձինք եւ դիտորդները: Այդ առումով նախագծի դրույթները համահունչ չեն հիշյալ հոդվածում ամրագրված դրույթներին: Ելնելով շարադրվածից` Հայաստանի Հանրապետության կառավարությունը դեմ է ներկայացված նախագծին»:
Կարդացեք նաև
Կարճ ասած՝ կառավարությունը գտնում է, որ օրհներգն ամեն տեղի-անտեղի, ամեն դիտորդի ու վստահված անձանց համար չպիտի հնչեցվի:
Նելլի ԲԱԲԱՅԱՆ
