ԱԺ-ում 2016-ի բյուջեի նախագծի քննարկումները դեռ ընթանում են: ՀՀԿ պատգամավոր Մանվել Բադեյանն ուշադիր հետեւել էր պատգամավորների ելույթներին եւ իր ելույթում կիսեց ստացած տպավորությունները:
Նա անդրադարձավ Նիկոլ Փաշինյանի ելույթին՝ ասելով, որ այս պատգամավորը փայլուն ֆելիետոնիստ է, լավ հռետոր, տիրապետում է սոցիալական դեմագոգիայի բոլոր կանոններին. «Ուզում եմ նրան անդրադառնալ եւ բերեմ հարցադրումը, որ մարդն ուղղել էր Դանիայի պառլամենտին, թե ինչքա՞ն ծառայողական մեքենա կա իրենց պառլամենտում: Եթե հարց ուղղեր, թե ինչքա՞ն հաց եւ հացամթերք են ուտում Դանիայի պառլամենտականները եւ հաշվարկեին, թիվ ցույց կտային, որով կերեւար, որ դանիայի պատգամավորը 3 անգամ քիչ է հաց ուտում, քան Հայաստանի պատգամավորը: Սա դեմագոգիայի բացառիկ օրինակ է: Իհարկե, դանիացիների սննդի կառուցվածքը ուրիշ է: Հայերն ավելի շատ հաց են ուտում, դանիացիք ավելի շատ ձուկ են ուտում, իրենց հացը քիչ կլինի, բայց կարելի է թափահարել դա ու ասել՝ տեսե՜ք, ցելի Դանիայի պատգամավորները ավելի քիչ են հաց ուտում»:
Ըստ Մանվել Բադեյանի, եթե Փաշինյանն այլ կերպ ձեւակերպեր հարցը՝ որքան են ծախսում Դանիայում մեկ պատգամավորի տրանսպորտային սպասարկման վրա: Դա ուրիշ հարց կլիներ, որովհետեւ Դանիայում էլ ծախսեր են անում ու ապահովում պատգամավորներին. «Հարցում արեք՝ որքան է կազմում Դանիայի պատգամավորի աշխատավարձը, ի՞նչ ունեցվածք ունի Դանիայի վարչապետը, ֆինանսների նախարարը: Մեր ֆինանսների նախարարին հարցնում է՝ պարո՛ն Խաչատրյան, դուք Հրազդանի հարկայինի պետի տեղակալ եղած վա՞խտ էիք զբաղվում բիզնեսով, թե՞ մաքսայինի պետ եղած ժամանակ, էդ ի՞նչ եղավ, որ սկսեցիք զբաղվել բիզնեսով: Ի՞նչ եղավ՝ երեխեքը մեծացան»:
Նա քննադատեց, որ Հայաստանում քարոզում են, թե բիզնեսով զբաղվելը սխալ է. «Բոլորը կարծում են, թե հարստությունը ստեղծվում է ֆոկուսով՝ պիտի դառնան նախարար, բանկիր, ոչ ոք չի մտածում աշխատելու մասին: Մարդը իր հաջողությունները կապում է ինչ-որ վիշապների հետ»:
Կարդացեք նաև
Նա վստահեցրեց, որ իրականում ֆոկուսով ոչինչ չի լինում, միայն աշխատանքով է լինում:
Հռիփսիմե ՋԵԲԵՋՅԱՆ
