Երևանի Շենգավիթ վարչական շրջանի ընդհանուր իրավասության դատարանում (նախագահող դատավոր՝ Արմեն Չիչոյան) այսօր ընթացավ հերթական դատական նիստը` «Նաիրիտ» գործարանի սնանկացման հայցով ՀԷՑ-ի քաղաքացիական հայցադիմումի քննությամբ:
Նշենք, որ «Նաիրիտի» ներկայացուցիչ Արմեն Աբովյանը միջնորդություն էր ներկայացրել, որպեսզի վեճը լուծվի հաշտության կնքմամբ: ՀԷՑ-ի ներկայացուցիչն այսօր դրան չառարկեց: Նիստը հետաձգվեց, քանի որ ընթանում են վեճը հաշտեցմամբ լուծելու բանակցություններ: Դատարանը հայտարարեց, որ կողմերը հաջորդ դատական նիստի մասին նախապես կծանուցվեն:
Aravot.am-ը պարոն Աբովյանից հետաքրքրվեց, հաշտության ի՞նչ տարբերակներ են քննարկվում, նա պատասխանեց. «Բանակցություններ են ընթանում վեճն առանց դատարանի լուծելու համար: Չեմ կարող ասել` ինչ տարբերակներ կան, դա ավելի մասնագիտական խնդիր է, իսկ ես իրավաբան եմ ու չեմ տիրապետում այդ տեղեկատվությանը»:
Տաթև ՀԱՐՈՒԹՅՈՒՆՅԱՆ
