Արդարադատության նախարար Արփինե Հովհաննիսյանն ԱԺ-ում 2016-ի բյուջեի նախագծի քննարկման ժամանակ ներկայացրեց, թե ինչ ծախսեր է պատրաստվում անել իր ոլորտում:
Նա անդրադարձավ նախ քրեակատարողական հիմնարկների խնդրին եւ ասաց, որ վատ ժառանգություն է ստացել. «Ունենք հիմնարկներ՝ նախանցած դարից: Այդ հիմնարկներում դատապարտյալին պահելու պայմաններն անմխիթար են: Ազատազրկումը ենթադրում է հենց անձի ազատությունը սահմանափակել, ազատությունից զրկել, ոչ թե զրկանքներ պատճառել: Բայց հիմա, կամա թե ակամա, շատ դատապարտյալներ զրկանքների են ենթարկվում՝ ազատազրկում պատժատեսակը կրելիս»:
Նա ասաց, որ կառավարությունն այս ուղղությամբ բազմաթիվ աշխատանքներ է ձեռնարկել, առաջին հերթին Արմավիր քրեակատարողականի կառուցումը, որի առաջին մասնաշենքը արդեն հանձնվել է շահագործման: Այն խիստ պայմաններ ունի, բայց համապատասխանում է եվրոպական չափանիշներին:
Բայց նախարարը նշեց, որ իրենք չեն պատրաստվում այդ խիստ ծախսատար ճանապարհով շարժվել՝ քրեակատարողականների խնդիրը լուծելու համար. «Կառավարությունն այստեղ պիտի ձեռնարկի կոնցեպտուալ միջոցառումներ, կարեւոր եմ համարում պրոբացիոն ծառայության ներդրումը՝ անձի վերաինտեգրման համար»:
Կարդացեք նաև
Նա ասաց, որ չափազանց կարեւորում է հանրային պաշտպանի գրասենյակի ինստիտուտի ներմուծումը ՀՀ. «Թեեւ ծանր սոցիալական պայմաններում չպիտի մոռանանք, որ մենք սոցիալական պետություն ենք եւ բեռ պետք է ստանձնենք»:
Գրասենյակն այսօր 50 հանրային փաստաբաններով կարիքավոր խավին անվճար խորհրդատվություն է տրամադրում:
Նախարարությունն այս ինստիտուտում բարեփոխումները շարունակելու է:
Հռիփսիմե ՋԵԲԵՋՅԱՆ
