Քաղաքագետ Սերգեյ Մինասյանի դիտարկմամբ՝ Փարիզի ահաբեկչությունը Իսլամական պետություն (ԻՊ) խմբավորման դեմ պայքարում կհամախմբի Արեւմուտքին եւ Ռուսաստանին:
«Եթե ոչ համատեղ, գոնե կոորդինացված գործողությունների հնարավորություն կտա ընդդեմ «Իսլամական պետություն» խմբավորման դեմ պայքարում»,-կարծում է քաղաքագետը:
Նրա խոսքով՝ ԻՊ-ի դեմ պայքարը միայն ռազմական ճանապարհով հնարավոր չէ. «Իսլամական պետություն խմբավորման կողմից կռվում են Իրաքի սունի փոքրամասնության եւ Սիրիայի սունի մեծամասնության դժգոհ տարրը, նրանց մի մասը նախկին Սադդամ Հուսեյնի զինվորներն ու գեներալներն են, որոնք լավ դիրքերում էին գտնվում Սադդամ Հուսեյնի ժամանակ, բայց ամերիկյան գործողությունից հետո, երբ իշխանությունը Իրաքում հանձնվեց շիա մեծամասնությանը, սունիները դրանից դժգոհեցին ու դրա ֆոնի վրա ավելացան կրոնական խնդիրները: Ինչո՞ւ պայքարը ԻՊ-ի դեմ հնարավոր չէ ռազմական ճանապարհով, որովհետեւ, եթե ավելանա ռազմական ճնշումը, ահաբեկչական գործողություններ են լինելու, հետեւաբար պետք է միջազգային քաղաքական եւ տնտեսական ներգրավվածություն»:
Պարոն Մինասյանը, անդրադառնալով Հայաստանի եւ ՌԴ միջեւ համատեղ հակաօդային պաշտպանության (ՀՕՊ) համակարգի ստեղծմանը, ասաց, որ այդ համակարգը տարիներ առաջ էր պլանավորվել, եւ այն փաստացի գործում է. «Համակարգը որակական նոր փուլ անցավ եւ վերջին իրադարձություններով պայմանավորված չէ: Այդ համակարգը Հայաստանին հնարավորություն կտա օդային սահմանը արդյունավետ պաշտպանել եւ արդիականացնել սեփական հակաօդային միջոցները»:
Կարդացեք նաև
Արփինե ՍԻՄՈՆՅԱՆ
