Անդրիաս Ղուկասյանի խոսքերով՝ ստեղծելով նման սպառնալիք կարելի է ստիպել Սերժ Սարգսյանին ու իր քրեական օլիգարխիկ թայֆային հետ կանգնել այս նախաձեռնությունից
«Նոր Հայաստան» հանրային փրկության ճակատը նոյեմբերի 17-ին հավաք էր կազմակերպել Արարատի մարզի Արտաշատ քաղաքում: Հավաքը մարդաշատ չէր: Իր ելույթի ընթացքում Անդրիաս Ղուկասյանն ասաց՝ հանրային փրկության ճակատը կոչ է անում ժողովրդին միավորվել եւ վերջ տալ թալանին:
«Մենք ասում ենք այսօր մեր ընդդիմախոսներին՝ ցույց տվե՛ք մի իրավունք ժողովրդին, որը որ այն Սահմանադրությամբ ընդլայնվում է, ավելանում է կամ դառնում է ավելի կատարյալ: Ժողովրդին վերաբերվող հատվածում մի իրավունք ցույց տվե՛ք, մենք ցույց ենք տալիս բազմաթիվ դեպքեր, բազմաթիվ իրավունքներ, որոնք որ ժողովրդից ուզում են խլել այս Սահմանադրությամբ: Դրա փոխարեն՝ քաղաքական ուժերին ասում են՝ ստեղծված են բարենպաստ պայմաններ, որ մենք բոլորով այսուհետ առանց իրար դեմ պայքարելու միասին զբաղվենք հանգիստ թալանով: Ժողովուրդն էլ այսուհետ ի վիճակի չի լինելու դրա դեմ որեւէ ձեւով պայքարել, որովհետեւ նույնիսկ հավաքների իրավունքն է սահմանափակվում ժողովրդի: Ուզենա էլ ժողովուրդը բողոքել, չի կարողանա, եւ միակ ճանապարհը ժողովրդին մնալու է ապստամբությունը»,- ասաց նա:
Կարդացեք նաև
Անդրիաս Ղուկասյանը հայտարարեց, որ «Նոր Հայաստանը» դեկտեմբերի 1-ին սկսելու է շուրջօրյա հավաքներ Երեւանում եւ մինչեւ դեկտեմբերի 6-ը, 7-ը նպատակ ունի երկրում այնպիսի մթնոլորտ ստեղծել, որ դեկտեմբերի 7-ի առավոտյան չկարողանան այդ որոշումը իրականացնել: Նա նշեց, որ հասունացել է այն պահը, երբ համախմբությունը կարող է բերել արմատական փոփոխությունների. «Մենք գտնում ենք, որ միայն ստեղծելով նման սպառնալիք կարելի է ստիպել Սերժ Սարգսյանին ու իր քրեական օլիգարխիկ թայֆային հետ կանգնել այս նախաձեռնությունից: Սա առաջին քայլն է դեպի իշխանափոխություն, որովհետեւ դրանից հետո նորից պիտի համախմբվենք բոլորս, որ վերջ տանք այս ռեժիմին»:
Ամի ՉԻՉԱԿՅԱՆ
