«Առաջինն ամբողջ նոր Սահմանադրության էությունն է, որը համապատասխանում է մեր պատկերացումներին: Այսինքն` խորհրդարանական կառավարման համակարգ: Սա արդեն շատ բան է ասում: Եթե մի փոքր ավելի մանրամասնենք, հաջորդը համամասնական ընտրակարգի ամրագրումն է նոր Սահմանադրության մեջ: Այսօր քաղաքական դաշտում գտնվող ընդդիմադիր բոլոր ուժերի տարիների տասնամյակների կռիվը, պայքարը, համոզումը, որ պետք է լինի 100% համամասնական ընտրակարգ»,- այս մասին այսօր «Մեդիա կենտրոնում», անդրադառնալով նոր Սահմանադրության ամենակարեւոր դրական կողմերին, ասաց ՀՀ Ազգային ժողովի ՀՅԴ խմբակցության քարտուղար Աղվան Վարդանյանը:
Երրորդ կարեւորագույն բաղադրիչն, ըստ Աղվան Վարդանյանի, ընդդիմության դերակատարությունն է պետական համակարգում. «Մեր այսօրվա գործող համակարգը փաստորեն ունի մի էական թերություն պետության կառավարման առումով: Եթե որեւէ քաղաքական ուժ ունի մեծամասնություն, 51-52% է հավաքել, 47-48% հավաքած ուժերն ամբողջովին զրկվում են պետական կառավարմանը մասնակցելու հնարավորությունից: Սա անառողջ համակարգ է, սա առճակատման, թշնամանքի, միմյանց հանդեպ չարության մթնոլորտ է ստեղծում»:
Նա ասաց, որ իրենք Հայաստանում թշնամիներ չունեն: Իրենք որեւէ մեկին չենք վերաբերվում իբրեւ թշնամիներ. «Մեր նպատակը քննադատելը, հայհոյելը, բողոքելը, դժգոհելը, ամբոխահաճո բաներ ասելը եւ դրանով դիվիդենտներ շահելը երբեք չի եղել: Մեր նպատակը եղել է ունենալ այնպիսի պետություն, որտեղ բոլորը կարող են իրենց տեղն ունենալ եւ միմյանց լրացնելով, բանակցելով, բանավիճելով, զիջումների գալով գտնել լավագույն լուծումները: Նոր Սահմանադրությունն ընդդիմությանը տալիս է գործուն այնպիսի լծակներ, որոնց մասին ցանկացած ընդդիմադիր ուժ կերազեր»:
Ըստ պարոն Վարդանյանի՝ այժմ մի այնպիսի վիճակ է ստացվել, որ նրանք, ովքեր այս Սահմանադրության նախագծին «ոչ» են ասում, նրանք ուզեն, թե չուզեն «այո» են ասում գործող Սահմանադրությանը, որին իրենք 2005 թվականին «ոչ» են ասել. «Ստեղծվում է մի տարօրինակ վիճակ: Հիմա կարող է 20 տարի հետո նոր Սահմանադրություն լինի, հիմա էլ էլի ոչ ասեն նրան, այո ասելով, պահպանելով այս մեկը»:
Կարդացեք նաև
Աշոտ ԻՍՐԱԵԼՅԱՆ
Լուսանկարը՝ «Մեդիա կենտրոնի»
