ԱԻՄ առաջնորդ Պարույր Հայրիկյանի բնորոշմամբ, հայ ժողովրդի գլուխը կտրելու կացինը «ԿԸՀ վարձկան անդամների» ձեռքին է:
«ԿԸՀ-ի ձեռքին է ամեն ինչ, որ եւս մեկ անգամ պղծի հայ քաղաքական պատմությունը»,- այսօր «Հայացք» ակումբում ասաց Պարույր Հայրիկյանը: Վաղը կեսօրից հետո ԱԻՄ-ականները հենց կենտրոնական ընտրական հանձնաժողովի դիմաց բողոքի ակցիա կանցկացնեն:
ԱԻՄ առաջնորդի խոսքով, սահմանադրական փոփոխությունների գործընթացը գովելի է, եթե մի պետության մեջ չկա այդ փոփոխությունների պահանջարկը, նշանակում է՝ այդ պետության մեջ լճացում կա. «Բայց սահմանադրական փոփոխությունները հանրության պահանջարկով պետք է լինեն: Այլ բան է, որ մեր իշխանությունները սկզբում բարեփոխում էին կոչում, հետո զգացին, որ ապուշություն է, հիմա ասում են՝ փոփոխություն»:
Պարոն Հայրիկյանը կրկին անդրադարձավ սահմանադրական փոփոխությունների իր նախագծին, որը հաշվի չառնվեց ու ափսոսանքով ասաց՝ այդ նախագծով նախատեսում էր Հայաստանը դարձնել ժողովրդավարական պետություն.
Կարդացեք նաև
«Այն, որ մեր նախաձեռնությունը զարգացում չապրեց, թույլ է տալիս մեզ ասել, որ այսօրվա սահմանադրական փոփոխությունների գործընթացն ապօրինի է:
Բոլորը պետք է միաբերան ասեին ոչ այս հանրաքվեին, որովհետեւ եղել է այլընտրանք, որը մերժվել է: Բայց քանի որ բոլորը իշխանությունների կողմից փչացած են ուղնուծուծով, նման բան չեն անում:
Ողջ գործընթացի հիմքում տրամաբանություն փնտրողները մոլորված են: Այո-ի ու ոչ-ի քարոզողները մեկ դաշտում են: Ակնհայտ է՝ վերեւից են ասել սահմանադրական փոփոխությունների մասին, ասել են՝ պետք է մտնես ԵՏՄ, իսկ Հայաստանը մեզ թույլ է պետք, պետք է անցնեք խորհրդարանական համակարգի»:
Պարույր Հայրիկյանի խոսքով, իրեն օգնել ու օգնելու են ոչ-ի ճակատին, որովհետեւ հավատում են՝ ազնիվ մղումներ ունեն. «Պետք է փորձենք մեր ճիշտ պատկերացումները նաեւ իրենցը դարձնել»:
Արփինե ՍԻՄՈՆՅԱՆ
