էկոնոմիկայի նախարար Կարեն Ճշմարիտյանն այսօր Հայաստան-ԱՄՆ առեւտրի եւ ներդրումային հարցերի խորհրդի նիստի ժամանակ, պատասխանելով լրագրողների հարցերին, անդրադարձավ նաեւ ՀՀ-ում ԱՄՆ դեսպանի նույն նիստի ժամանակ արված հայտարարություններին:
Դեսպանը մասնավորապես ակնարկել էր Հայաստանում տիրող կոռուպցիայի, անհավասար մրցակցային դաշտի մասին, ինչը դեսպան Ռիչարդ Միլսի համոզմամբ, խոչընդոտում է ներդրումների աճին: Պարոն Ճշմարիտյանն ասաց, որ կոռուպցիայի դեմ պայքարն ու հավասար մրցակցային պայմանների ստեղծումը ավելի շատ ուղղված են համակարգային փոփոխություններին. «Ընդհանուր առմամբ կոռուպցիայի դեմ պայքարն ավելի շատ նախատեսում է այն մոտիվացիաների, հնարավորությունների վերացում, որոնք թույլ են տալիս այդպիսի երեւույթներ: Իսկ դրա հիմքում ընկած է առաջինը հենց օրենսդրության կատարելագործումը, որի արդյունքում մենք ունենում ենք գործարար միջավայրի բարելավման ցուցանիշները»:
Ըստ էկոնոմիկայի նախարարի մասնավորապես, խոսքը վերաբերում է մասնավոր եւ պետական հատվածի նվազագույն շփումների իրականացմանը, հնարավոր թույլտվությունների, լիցենզիաների կամ պետական չինովնիկից կախված որեւէ հարաբերության նվազեցմանը: «Սա ամբողջ աշխարհի փորձն է»,- ասաց Կարեն Ճշմարիտյանը:
Հարցին, թե ներդրումների նվազումը փաստորեն վկայում է, որ կոռուպցիան տարածված է Հայաստանում, էկոնոմիկայի նախարարն ի պատասխան ասաց, որ ներդրումների նվազում չկա. «Դուք անընդհատ շեշտում եք՝ չլսելով պետական մարմինների բազմաթիվ հայտարարությունները, որ կա ներդրումների փոքր, բայց ավելացում»:
Կարդացեք նաև
Ըստ նրա, օտարերկրյա ներդրումները բաղկացած են մի քանի տեսակի ներդրումներից, իսկ ընդհանուր ծավալն այս տարի ավելացել է 4.7 միլիարդ դրամով:
Կարեն Ճշմարիտյանը անպատասխան թողեց հարցը, թե ինչո՞ւ են Հայաստանի պաշտոնյաները սերտաճած բիզնեսի հետ. «Ես սովոր եմ թեմայից խոսել, ոչ թե բամբասանքներ մեկնաբանել»:
Լուսինե ԲՈՒԴԱՂՅԱՆ
