Վերջին օրերին մարզաշխարհում ամենաքննարկվող թեման WADA-ի անկախ հանձնաժողովի զեկույցն է համաշխարհային թեթեւ աթլետիկայում տիրող դոպինգային սկանդալային իրավիճակի մասին:
Aravot.am-ը երեկ զրուցել է Հայաստանի թեթեւ աթլետիկայի ֆեդերացիայի նախագահ, լեգենդար հեռացատկորդ, Եվրոպայի չգերազանցված ռեկորդակիր Ռոբերտ Էմմիյանի հետ: «Ես միանշանակ դատապարտում եմ դոպինգի օգտագործումը՝ դա լինի իմ, թե մեկ այլ մարզաձեւում: Արգելված խթանիչ օգտագործող ցանկացած մարզիկ պետք է խստորեն պատժվի ու նշանակություն չունի՝ ռուս է, ամերիկացի, եվրոպացի: Սպորտում պետք է լինի ազնիվ պայքար ու պետք է հաղթի իսկապես ուժեղագույնը եւ արժանավորը: Այս առումով դոպինգի դեմ հայտարարված տոտալ պայքարը ողջունում եմ: Սակայն իմ կարծիքով պատժամիջոցները պետք է սահմանվեն ու կիրառվեն այնպես, որպեսզի ազնիվ ու մաքուր մարզիկները դրանից չտուժեն», – ասաց Ռոբերտ Էմմիյանը:
Դոպինգի եւ արգելված խթանիչների օգտագործման անթույլատրելիությունը շեշտեց նաեւ Սպորտի եւ երիտասարդության հարցերի նախարար Գաբրիել Ղազարյանը՝ երեկ ընդունելով Եվրոպայի աթլետիկայի ֆեդերացիայի նախագահ Սվեն Առնե Հանսենին եւ գլխավոր քարտուղար Քրիստիան Մելցին:
Աշոտ ՀԱԿՈԲՅԱՆ
