«Առավոտը» տրանսպորտի եւ կապի նախարար Գագիկ Բեգլարյանից հետաքրքրվեց՝ 93-ից պետական պաշտոններ եք զբաղեցնում՝ ԳԽ պատգամավոր, Երեւանի քաղաքապետ, թաղապետ, նախարար ու այնպիսի աստղաբաշխական թվերով ունեցվածք եք հայտարարագրել դուք, ձեր կինն ու որդին, որ մեր ամենահարուստ նախարարական ընտանիքներից եք, ինչպե՞ս եք կուտակել այդ ամենը: Նախարարը պատասխանեց. «Ես բիզնեսից եմ եկել պետական պաշտոնի: Ես 95-ից մինչեւ 2002-ը իմ բիզնեսներով եմ զբաղվել, իսկ Գերագույն խորհրդի պատգամավորին օրենքը չէր արգելում գործարարությամբ զբաղվել: Հիմա հասկացա՞ք, թե որտեղից են գալիս իմ գումարները: Ես որ թաղապետ եղա, արդեն բիզնեսներ ունեի:
Բայց ամենահարուստ նախարա՞րն եմ որ»: Գագիկ Բեգլարյանը մի դրվագ հիշեցրեց. «Հիշո՞ւմ եք, երբ առաջին անգամ ես ներկայացրեցի իմ հայտարարագիրը, Արշակ Սադոյանն ինչ ասեց: Չէ, մի հատ դուք հիշեք՝ ասեց՝ միակ մարդը, որը ճիշտ է ներկայացրել հայտարարագիրը: Ես պատահական չինովնիկ չեմ: Բիզնեսներ եմ ունեցել, եւ իմ գումարներն այդտեղից են»:
Մեր դիտարկմանը, որ այս աղքատ երկրում Ձեր կինը 500 մլն-անոց բնակելի տուն, 27 մլն-անոց հողամաս է առնում, Գագիկ Բեգլարյանն արձագանքեց՝ «բայց իմացեք, թե որտեղից է գալիս դա»:
ՀՌԻՓՍԻՄԵ ՋԵԲԵՋՅԱՆ
Կարդացեք նաև
«Առավոտ» օրաթերթ
14.11..2015
