«Կրթության ոլորտում կոռուպցիան բազմաձեւ է եւ բազմաբաղադրիչ, տարբեր պատճառներ եւ դրսեւորումներ ունի: Հետեւաբար, կոռուպցիայի դեմ պայքարը թողնել բացառապես իշխանության վրա, նշանակում է՝ քաղաքականացնել խնդիրը: Այո, իշխանությունները պատասխանատու են, բայց առանց հանրային ախտորոշման՝ կոռուպցիան հիվանդություն է»,-այսօր Ծաղկաձորում կազմակերպված «Բարեվարքության ամրապնդում բարձրագույն կրթության համակարգում» խորագրով համաժողովի ընթացքում լրագրողներին ասաց կրթության եւ գիտության նախարար Արմեն Աշոտյանը:
Նրա դիտարկմամբ՝ ոչ մի կրթության նախարար չի կարող հետեւել 100 հազար ուսանողի ակադեմիական, ընթացիկ եւ միջանկյալ գործունեությանը. «Ոչ մի նախարարություն միայնակ չի կարող պատասխանատու լինել հսկայական ոլորտի համար: Կոռուպցիայի հանդեպ անհանդուրժողականություն ձեւավորելը յուրաքանչյուրի պարտավորությունն է: Քանի դեռ հանրության շրջանում ընկալում կա, թե ամեն մեկը պետք է իր գործն անի, իսկ իշխանությունը՝ պայքարի, մենք ոչնչի չենք հասնի»:
Արմեն Աշոտյանի խոսքով՝ նախարարությունն աշխատում է միջազգային կառույցների հետ՝ հակակոռուպցիոն ծրագրեր քննարկելու նպատակով: «Կրթության ոլորտում կոռուպցիոն ռիսկերի նվազում կա, բայց այդ ցուցանիշը փոքր է: Մենք չենք կարողացել այս պայքարը դարձնել համընդհանուր գերակայություն»,-եզրափակեց կրթության նախարարը:
Լուիզա ՍՈՒՔԻԱՍՅԱՆ
