Ինչպես արդեն տեղեկացրել ենք, Հանրաքվեի կենտրոնական հանձնաժողովը կիրակի՝ նոյեմբերի 15-ին, մերժեց ԱԻՄ առաջնորդ Պարույր Հայրիկյանի դիմումը, որը պահանջում էր կասեցնել դեկտեմբերի 6-ին կայանալիք հանրաքվեն:
Պարույր Հայրիկյանը Aravot.am-ի հետ զրույցում՝ անդրադառնալով այդ որոշմանն ասաց. «Բնականաբար, ես հրաշքների հավատում եմ, բայց գիտեմ, թե նաեւ ինչ երկրում ենք ապրում: Ամեն դեպքում ես հնարավորություն տվեցի նաեւ անձնականի շեշտադրումով, պատահական չէր այդ դիմումի բովանդակությունը: Ամբողջ խորությամբ կարդացողը կհասկանա, որ այդտեղ ուղղակի մարդկային պատասխանատվության վրա է շեշտադրում կատարվում: Այլ բան ասել այսօր Հայաստանում ամբողջապես ստրկացված կառույցներից դժվար է»:
Սակայն, ԱԻՄ առաջնորդը համարում է, որ իրավական տեսակետից Տիգրան Մուկուչյանի ներկայացրած հիմնավորումները հասկանալի են. «Բայց նույն իրավական տեսակետից, եթե ազնիվ մարդ ես, ասում ես՝ բարեկամնե՛ր, մենք խոսում ենք իրավունքի մասին՝ բնական իրավունքի, խախտված է բնական իրավունքը. Սահմանադրության շատ լուրջ խախտում է տեղի ունեցել եւ այդ բնական օրենքը, որը խախտվել է, չի խախտվել այն պատճառով, որ խանգարում է ուրիշների իրավունքներին: Այսինքն` իրենք հակասության մեջ են: Այս գործընթացը, որը ես անում էի որպես ընդհանուր գործընթացի հերթական քայլերից մեկը՝ նախապատրաստվելով ամսի 18-ի բողոքի ցույցին եւ հետագա մյուս քայլերը, որոնք բավական խորը մտածված եմ, մինչեւ վերջ՝ մինչեւ Մարդու իրավունքների եվրոպական դատարան եւ այլ քայլեր»:
Aravot.am-ի հարցին, թե այսինքն՝ Հայրիկյանը պատրաստվո՞ւմ է բողոքարկել Հանրաքվեի կենտրոնական հանձնաժողովի ընդունած որոշումը, նա պատասխանեց, որ բոլոր հնարավորությունները օգտագործելու է:
Կարդացեք նաև
Ամի ՉԻՉԱԿՅԱՆ
