Aravot.am-ը Աբովյան քաղաքի փողոցներում անցորդներից հետաքրքրվեց, թե արդյոք տեղյա՞կ են սահմանադրական փոփոխություններից, եւ կո՞ղմ են, թե՞ դեմ են նրանց:
Քաղաքացիներից ոմանք հայտարարեցին, որ կողմ են ոչ թե սահմանադրական փոփոխություններին, այլ արմատական փոփոխություններին: Նրանց պնդմամբ՝ առաջընթաց կլինի միայն այն դեպքում, երբ բոլոր պաշտոնյաները պաշտոնաթող արվեն: Այդ քաղաքացիներից մեկից հետաքրքրվեցինք, թե արդյոք մասնակցելո՞ւ է հանրաքվեին, նա պատասխանեց. «Ամոթ չի՞՝ իմ նման տղեն գնա հանրաքվեին մասնակցի»:
Ինչպես Չարենցավանում, Աբովյանում եւս որոշ քաղաքացիներ հայտարարեցին, թե կարեւոր չէ իրենց դիրքորոշումը եւ հանրաքվեի ընթացքում իրենց ձայնը որոշիչ չի լինելու:
Քաղաքացիներից ոմանք էլ դեռ կողմնորոշված չէին, հարցվածներից մեկը, որը ուսումնասիրել էր սահմանադրական փոփոխությունների նախագիծը ասաց, որ նախագծում ե՛ւ դրական դրույթներ կան, ե՛ւ մտահոգիչ: Այդ իսկ պատճառով՝ նա դեռ չի կողմնորոշվել եւ հնարավոր է եւ չմասնակցի հանրաքվեին:
Կարդացեք նաև
Ինչպես Չարենցավանում, այնպես էլ Աբովյանում հարցվածները հարցին, թե ինչո՞ւ են դեմ փոփոխությունների նախագծին, պատասխանում էին, որ գործող Սահմանադրությունը լավն է, չարժե այն փոխել:
Հարցման մանրամասները՝ տեսանյութում:
Ամի ՉԻՉԱԿՅԱՆ
