«Արեւորդի» 5-րդ բնապահպանական փառատոնի շրջանակում այսօր Երեւանի կենդանաբանական այգում կազմակերպվեց «Դդմի օր-դիմակահանդես» տոն-մրցույթը, որին մասնակցեցին մայրաքաղաքի եւ մարզերի 34 դպրոցների մոտ 300 աշակերտներ: Փոքրիկ խոհարարները դդմից եւ այլ բանջարեղենից կերակուրներ պատրաստեցին: Ի դեպ, աշակերտները ներկայացել էին տարբեր կենդանիների խորհրդանշող հագուստներով, որոնք պատրաստվել են բնապահպանական թափոնից:
Թիվ 196 դպրոցի 6-րդ դասարանցիները մրցույթին մասնակցում էին սիրամարգի հանդերձանքով, որը կարել են իրենց ուսուցչուհու օգնությամբ. «Մեզ հետ բերել ենք դդումներ, մրգեր, որպեսզի կենդանաբանական այգու սիրամարգի համար կերակուր պատրաստենք: Դդումից կփորձենք «սիրամարգ» սարքել: Մեջը փորելու ենք եւ հազարի միջոցով պոչի տեսք ենք տալու: Նաեւ աչքեր ենք սարքելու, քիթ, կտուց»,-Aravot.am-ի հետ զրույցում ասաց Անի Հովհաննիսյանը:
«Դդմի օր» դիմակահանդես-միջոցառման համակարգող Մանե Մադոյանն էլ մեզ հետ զրույցում ասաց, որ նախաձեռնությունը երեխաներին կենդանիներին, ինչպես նաեւ նրանց սննդակարգին եւ վարքագծին ծանոթացնելու միջոց է, որով աշակերտներն ավելի են մոտենում բնությանը. «Դդումը սեզոնային լավ բանջարեղեն է, որը մեր կենդանիները շատ են սիրում: Դդմի միջոցով երեխաները սովորում են, թե կենդանիներն ինչ են ուտում, ինչ չափով ու ինչ քանակությամբ պետք է մանրացնել բանջարեղենը»:
Կարդացեք նաև
Մանե Մադոյանը նշեց, որ մրցույթի մասնակիցներին նախապես տրամադրվել է այգու կենդանիների սննդակարգն ապահովող մասնագետի հեռախոսահամարը, որպեսզի երեխաները հետաքրքրվեն՝ ինչպես կերակրել այգու բնակիչներին:
Միջոցառման ավարտին իրենց պատրաստած դդմե կերակուրներն աշակերտները հյուրասիրեցին կենդանիներին: Երեխաները պարգեւատրվեցին ըստ մի շարք անվանակարգերի: Նաեւ տեղի ունեցավ կենդանիների դիմակահանդես-շքերթ:
Լուիզա ՍՈՒՔԻԱՍՅԱՆ
Կեցցէ Հայաստանի/Արցախի երեխաները:
Մեր միակ Փրկութիւնը
(քանզի երեւի մեծերի պարագային, յոյս չկայ)
https://www.shoushisummercamp.org/