Մասնագիտությամբ հագուստի մոդելավորողը տարիներ առաջ չէր էլ կարող պատկերացնել, որ օրերից մի օր ունենալու է տիկնիկների իր հավաքածուն: Չէր էլ մտածում, որ հարսիկ-տիկնիկներ կպատրաստի: Մեզ հետ զրույցում տիկնիկագործ Էլմիրան պատմել է իր առաջին տիկնիկի ծնունդից մինչ վաճառքի պատմությունը:
-Առաջին տիկնիկդ քանի՞ տարեկան է:
– Էլոիզը մեկ տարեկան է: Նրան այդպես է անվանել եղբորս կինը: Մինչ օրս էլ բոլոր տիկնիկներիս այդպես եմ կոչել: Իսկ Էլոիզը աշխարհ եկավ 2014-ի աշնանը: Վերջերս հաճախ եմ վերադառնում մանկություն, դա անում եմ տիկնիկներ ստեղծելով:
– Ինչի՞ց ոգեշնչվելով են նրանք ծնվում:
– Բնությունն է ինձ ոգեշնչում, երաժշտությունը, նաեւ իրականությունն ավելի հետաքրքիր դարձնելու ձգտումը:
– Առաջնեկ տիկնիկդ ո՞ւմ էր նման:
– Ինձ էր նման, հետագայում ստեղծված բոլոր տիկնիկներս՝ նույնպես: Համենայնդեպս, այդպես են ասում: Գրեթե բոլորը վառ գույնի հագուստներով են, կարմիր, գանգուր մազերով:
– Հաճա՞խ ես նրանց հետ զրուցում:
– Միշտ… Նրանք կարծես լսում են ինձ: Ամեն տիկնիկ իր բնավորությունն ունի… Երբ երկար ժամանակով բաժանվում եմ նրանցից, կարոտում եմ: Որոշ տիկնիկներ նվիրել եմ հարազատ մարդկանց: Մի տիկնիկ ունեմ, որը դեմք չունի, բայց յուրատեսակ նրբություն կա նրա մեջ: Մեկն էլ շատ մեծ ջերմություն եւ հանգստություն ունի, կրում է փափուկ կտորից կարված մանկական գիշերազգեստ:
– Կա՞ տիկնիկ, որ միշտ քեզ ուղեկցելու է:
– Դրանք երկուսն են: Իրարից շատ տարբեր, բայց հարազատ: Մեկն անդեմ է, որը ջերմություն է տալիս ինձ: Դա ես եմ տանը՝ հանգիստ միջավայրում: Մյուսը անընդհատ շարժման մեջ գտնվող գործունյա կինն է, որը նույնպես ես եմ՝ դրսում, աշխատավայրում: Ինձ համար դրանք երկուսն էլ հավասարաչափ կարեւոր են: Առանց իրար նրանք պարզապես գոյություն ունենալ չեն կարող: Երբ ժամանակը գա, ստեղծելու եմ նաեւ սյուրռեալիստական ոճի տիկնիկներ: Պարզապես պահը դեռ չի հասունացել:
– Հայտնի մարդկանց կերպարով տիկնիկներ ստեղծած կա՞ս:
-Ունեմ նման մտահղացում:
– Կարողանո՞ւմ ես վաճառել տիկնիկներդ:
– Երբեմն վաճառում եմ, բայց ավելի շատ նվիրում եմ: Մտքերով միշտ վաճառվածների հետ եմ լինում: Միշտ մտածում եմ, թե ինչպիսի մարդ է գնորդը… Չնայած ընտրված տիկնիկից կարելի է եզրակացնել՝ ինչպիսի անհատ է նոր «տերը»: Իմիջիայլոց, Հայաստանում ավելի ընդունելի են հայկական էլեմենտներով տիկնիկները: Դա ողջունելի է, բայց ես ուրախ կլինեմ, եթե մի փոքր ընդլայնենք ճաշակի «շրջանակը»: Իմ ոճային տիկնիկներն էլ արդեն սկսել են սիրել եւ ընդունել:
Զրուցեց
ԴԻԱՆԱ ՂԱԶԱՐՅԱՆԸ
«Առավոտ» օրաթերթ
13.11..2015
