Հայաստանը հուսալի վարկառու է, պետական պարտքն էլ կառավարելի մակարդակում է. այսօր այս մասին ասաց Հայաստանում Ասիական զարգացման բանկի (ԱԶԲ) մշտական առաքելության տնօրեն Դեյվիդ Դոուլը՝ պատասխանելով Aravot.am-ի հարցին՝ ՀՀ-ի պետական պարտքը մոտ 2 տարուց կրիտիկական շեմին է հասնելու, սակայն անընդհատ շատ արագ տեմպերով պարտքի բեռն ավելացնում են, արդյոք սա մտահո՞գիչ չէ եւ Հայաստանը վստահե՞լի վարկառու է:
Դեյվիդ Դոուլը կարծիք հայտնեց, որ ոչ մի կասկած չկա, որ Հայաստանը հուսալի վարկառու է. «Բայց մենք բոլորս պետք է ուշադրություն դարձնենք պարտքի մակարդակի վրա, ՀՆԱ-արտաքին պարտք հարաբերակցության 50%-ն այն մակարդակն է, որը սկսում է հատուկ ուշադրություն պահանջել: Չափազանց կարեւոր է, թե դա ինչպես է փոփոխվելու ապագայում, եւ պետք է շատ զգույշ լինել, թե՝ ինչ նոր ծրագրերն են ավելանում պետական պարտքին»:
Դուոլն ասաց, որ ՀՀ պետական պարտքն այսօր այն միջակայքում չէ, երբ որ շատ լուրջ մտահոգության առարկա է. «Բայց մենք ցանկանում ենք ամեն ինչ անել, որ այն չհասնի մտահոգիչ միջակայքին»:
ԱԶԲ-ի ներկայացուցիչը վստահեցրեց, որ ՀՀ կառավարությունը շատ լավ ու պահպանողական աշխատանք է տանում պարտքը կառավարելու համար, ՀՀ կառավարությունը շատ պահպանողական է նաեւ, թե ինչ նոր ծրագրեր են ավելանում եւ այդ ծրագրերի հաջորդականության հարցում: Դոուլը վստահեցրեց, որ դա խթան է տնտեսության զարգացման համար, եւ ԱԶԲ-ն ամեն ինչ անելու է, որպեսզի ՀՀ պարտքը վտանգավոր ու մտահոգիչ սահմանին չհասնի:
Կարդացեք նաև
Նկատենք, որ Ասիական զարգացման բանկը այս տարվա հոկտեմբերի դրությամբ Հայաստանի Հանրապետությանը տրամադրել է 1,4 միլիարդ դոլարի վարկ:
Լրագրողներից մեկի հարցին՝ ի՞նչ կանխատեսումներ ունի 2016 թվականին Հայաստանի տնտեսական աճի վերաբերյալ. Կառավարության ներկայացուցիչներն ասում են՝ հաջորդ տարի ավելի վատ է լինելու, եւ 2.2% աճ են նշում, Դոուլն ասաց, որ եկող տարի վատթարացում չի լինի, տնտեսական աճն իրենք էլ մոտ 2% են կանխատեսում. «Այս տարվա համեմատ հաջորդ տարի չենք ակնկալում, որ տնտեսության քայքայում կլինի: Այս տարի Հայաստանի տնտեսությունն ավելի լավ ցուցանիշներ է արձանագրել, քան կանխատեսում էինք: Օտարերկրյա ներդրումների ծավալների ու տրանսֆերտների նվազման պայմաններում այս տարի դրական է եղել գյուղատնտեսության ոլորտի կտրուկ աճը: Միգուցե պատճառը բախտն է եղել, որ բարենպաստ եղանակ է եղել, բայց մենք չենք ակնկալում, որ հաջորդ տարի ավելի վատ կլինի:
Դոուլը նշեց, որ անհնար է վարկային ծրագրերն արդյունավետ իրականացնել, եթե չկան հմուտ ու փորձառու մասնագետներ, իսկ Հայաստանն այսօր նման մասնագետների կարիք ունի:
Լրագրողների այն հարցին էլ՝ Հյուսիս-հարավ ավտոճանապարհի կառուցման համար ԱԶԲ-ն վարկային միջոցներ է տրամադրել, ՀՀ կառավարությունը որքան տույժեր պիտի վճարի աշխատանքների ուշացման համար, Դոուլը որեւէ թիվ չնշեց, բայց նկատեց, որ նման խնդիր կա: Նրա կարծիքով. «Ամենամեծ մտահոգությունը ոչ թե տույժերի հարցն է, այլ այն օգուտների կորուստն է, որ մենք կարող էինք ունենալ այս ծրագրից: Պետք է ավարտել ծրագիրն ավելի շուտ, ուշացումները բացառել, որպեսզի օգուտները շատ լինեն»:
Նելլի ԲԱԲԱՅԱՆ
