Քաղաքական վերլուծաբան Ստյոպա Սաֆարյանը սահմանադրական փոփոխություններում մեծ ռիսկեր է տեսնում:
«Այն, ինչ այսօր խոստանում ու հայտարարում են, հետագայում մենք դրանք դժվար թե տեսնենք: Ամենակարեւոր խնդիրը սահմանադրական ցանկացած փոփոխության դեպքում մնում է իշխանության ճյուղերի տարանջատումն ու հակակշիռների ստեղծումը: Գործող սահմանադրության մեջ բացակայում է իշխանության ճյուղերի տարանջատումը, բայց ի՞նչ ունենք առաջարկվող նախագծում: Չեմ տեսնում իշխանության ճյուղերի տարանջատումը: Առաջարկվող տարբերակում Բաղրամյան 26-ի ամենազորեղ աթոռը տեղափոխվում է այլ հասցե»,- ասաց պարոն Սաֆարյանը:
Նա կրկնեց մտահոգությունը, որ առաջարկվող փոփոխություններով միակուսակցական համակարգ է ստեղծվում, առանց ընտրությունների իշխանության փոփոխության բացառմամբ. «Իշխանության մի կարեւոր ինստիտուտ վերանում է, սա նշանակում է, որ մենք չենք ուզում տեսած լինել, թե ինչն է բացակայելու նոր Սահմանադրությունում: Արդյունքում կունենանք ավելի ուժեղ խորհրդարան, բայց թուլացած նախագահական ինստիտուտ: Եթե Սահմանադրությունում իշխանության ճյուղերի տարանջատումը չկա, ապա մյուս բոլոր գլուխները, որքան էլ սիրուն գրված լինեն, միեւնույնն է՝ չեն աշխատելու»:
Պարոն Սաֆարյանը, ժողովրդավարության առումով հետընթաց է նկատում մարդու իրավունքների բաժնում՝ պետական լիազորությունների եւ պատասխանատվության բացակայություն:
Կարդացեք նաև
«Կողմնակից եմ խորհրդարանական համակարգին, բայց չեմ կարող համարել, որ այն, ինչ առաջակվում է՝ այն կառավարման համակարգն է, որը ես եմ պատկերացնում: Երկու ասպեկտ, որի պատճառով իմ «ոչ»-ն է ձեւակերպվում՝ իշխանության ճյուղերի տարանջատման եւ անկախ դատական համակարգ ունենալու հեռանկարի բացակայությունը»:
Իրավապաշտպան Արթուր Սաքունցն էլ ասաց, եթե «այո» քարոզողներն իրեն երաշխավորեն, որ «Մարտի 1-ի» հանցագործությունն առաջարկվող փոփոխություններով կբացահայտվի ու մեղավորները պատասխանատվության կենթարկվեն, ինքը կողմ կքվեարկի այդ փոփոխություններին:
«Առաջարկվող փոփոխություններում ավելի անորոշություն կա, քան պատասխաններ: Իսկ վատ որոշակիությունն ավելի գերադասելի է, քան անորոշությունը, որի հետեւանքները կախված են սուբյեկտիվ գործոններից… սա իրավական պետության որոշակիության կոպիտ խախտում է: Առաջարկվում են խաղի անորոշ կանոններ: Մենք արդեն լուրջ խնդիրներ ունենք գործող սահմանադրության մեջ, բայց այն, ինչ առաջարկվում է՝ մեր մտահոգությունները չի լուծում, այլ մտահոգությունների նոր փաթեթ են առաջարկում:
Արփինե ՍԻՄՈՆՅԱՆ
