Սույն լուսանկարը երեկ տեղադրվել է «Ֆեյսբուք» սոցիալական ցանցում եւ պատմում է Գյումրու թիվ 6 դպրոցի մասին։
Գյումրու թիվ 6 դպրոցի տնօրեն Արտաշես Սարգսյանը այդ ներկայության մեջ արտառոց ոչինչ չի տեսնում։ Ասում է՝ տարիներ առաջ դպրոցը հիմնանորոգվել է երկու երկրների գործուն մասնակցությամբ, եւ շատ բնական է համարում, որ երախտագիտությունն էլ պետք է այդպես հայտնել։
Հայաստանի եւ Ռուսաստանի դրոշը, գերբը, հիմնը ու թիվ մեկ պաշտոնյաների լուսանկարները, ըստ տնօրենի, դպրոցի միջանցքում են 2001 թվականից ի վեր, բայց մինչեւ այժմ ոչ ոք դրա վերաբերյալ տարակուսանք չի արտահայտել։
«Դրանք դպրոցում կախված են 2001 թվականից առ այսօր։ Բացատրվում է նրանով, որ երկրաշարժից հետո՝ նույն 2001-ին, երկու երկրների անմիջական մասնակցությամբ վերակառուցվել է մեր դպրոցի շենքը։ Դա ինչ-որ մի տեղ երախտագիտություն է մեր հարեւան պետության նկատմամբ, այն պետության, որը մեր ազգի համար շատ մեծ բաներ է արել»,- պարզաբանեց Արտաշես Սարգսյանը։ Հաստատեց, որ երախտագիտության անկյունում լուսանկարները փոխվում են՝ ժամանակին ու ներկա իրողություններին համահունչ։
«Հիմա դա ինչ է, հանցագործությո՞ւն ենք արել, ինձ ասեք։ Ո՞ր իրակական նորմն ենք խախտել մենք»,- իր հերթին տարակուսեց տնօրենը։
Հարցին, թե ինքն ինչպիսի պատկերացումներ ունի պետականության, ինքնիշխանության, արժանապատվության մասին, Սարգսյանը պատասխանեց. «Նկարը խփելով ինչ է, պետության ինքնիշխանության վերաբերյալ որեւէ կասկա՞ծ կարող է հարուցվել»։
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
