Էրեբունի եւ Նուբարաշեն վարչական շրջանների ընդհանուր իրավասության դատարանում (նախագահող դատավոր Վարդան Գրիգորյան) այսօր շարունակվեց «օֆշորի գործով» դատական նիստը: Ընթանում է ապացույցների հետազոտման փուլը:
Այսօրվա դատական նիստին հետազոտվեց Կիպրոսի Հանրապետության հետ իրավական օգնության աջակցության շրջանակներում միջնորդությունների կատարման արդյունքների զննության վերաբերյալ արձանագրությունը: Այստեղ ներկայացված են տվյալներ այն մասին, թե օրինակ`օֆշորի գործով ամբաստանյալ Աշոտ Սուքիասյանին պատկանող «Ձորագյուղ» արտադրական կոոպերատիվի կողմից որքան գումար է փոխանցվել Կիպրոս և ինչի համար:
Օֆշորի գործով տուժող գործարար Փայլակ Հայրապետյանի ներկայացուցիչ Շալիկո Փիրուզյանը, ինչպես և նախորդ նիստում, պնդեց, որ Փայլակ Հայրապետյանի գույքի գրավադրմամբ գումարները չեն ծախսել բիզնես ծրագրի համաձայն: Նա դատարանի դահլիճում հայտարարեց. «Տաս միլիոնից ավելի վարկ է տրամադրվել հանքերի տաքացման համար, բայց այն չի օգտագործվել նպատակային»:
Միջամտեց ամբաստանյալ Աշոտ Սուքիասյանի պաշտպան Յուրիկ Խաչատրյանը, թե «հո Նոր տարվա տոլմա չէր, որ տաքացվեր, դա վերաբերում էր օդափոխությանը»:
Կարդացեք նաև
Նրան հակադարձելով` պարոն Փիրուզյանն ասաց. «Ապացույցները ներկայացվելուց հետո համոզվեցինք, որ վարկի առաջին իսկ օրվանից ոչ մի կոպեկ չի ծախսվել բիզնես ծրագրի նպատակով: Անհասկանալի է, թե այդ ի՞նչ նպատակներով են այս գումարները Կիպրոս փոխանցվել: Կիպրոսն ընդհանրապես այս վարկի, Փայլակ Հայրապետյանի հետ կապ չուներ: Եթե տուժողն իմանար, որ իր գումարները գնում է Կիպրոս, նա չէր համաձայնի: Նա ներդրումներ է արել Սիերա Լիոնեում հանքերի ամրացման համար, որից հետո պետք է ադամանդ գար Հայաստան: Բայց նման բան չի եղել: Սա փողերի լվացում է, խարդախությամբ Հայրապետյանի գույքին տիրանալ ու գումարներն անձնական կարիքները հոգալու համար ծախսել: Բոլոր ապացույցները փաստում են, որ նախաքննական մարմինների՝ Աշոտ Սուքիասյանին վերագրված մեղադրանքները տեղին են»:
Յուրիկ Խաչատրյանը հորդորեց նման հայտարարություններ չանել դատարանի դահլիճում, քանի դեռ չեն կարող մատնանշել փաստեր, սակայն դատավորը միջամտեց, թե ինքը պատրաստ է բոլոր կողմերի հանգամանալից ելույթները լսել: Նաև վրդովվեց, թե ամեն անգամ գործի ողջ նյութերին անդրադառնալու փոխարեն, ավելի լավ է կոնկրետ ապացույցի վերաբերյալ պարզաբանումներ ներկայացնել, անդրադառնալ այն միլիոններին, որ ամբաստանյալի կազմակերպությունից փոխանցվել են Կիպրոս:
Յուրիկ Խաչատրյանը, անդրադառնալով Շալիկո Փիրուզյանի հայտարարություններին, հարցրեց. «Որ ասում եք, թե գումարները ծախսվել են անձնական նպատակների համար, մեկ հիմք կա՞: Դա կերևա քննության ավարտին, երբ կհետազոտվեն բոլոր փաստաթղթերը: Ինչ վերաբերում է այն պնդումներին, թե Փայլակ Հայրապետյանի գույքը գրավադրելով են նրա գույքին տիրացել, ապա հիշեցնեմ, որ տուժողների գույքը Աշոտ Սուքիասյանը չի գրավադրել, այլ տուժողներն իրենք իրենց կամքով են գրավադրել այն` կողմերի միջև կնքված պայմանագրերով»:
Փայլակ Հայրապետյանը, վերջակետ դնելով կողմերի հակադարձումներին, հայտարարեց. «Հիմքը սա է. իմ տրամադրած գումարներից 4 միլիոն դոլարը հատկացվել է երկու լվացող մեքենա, 5 միլիոն դոլարը` այլ մեքենա սարքավորումներ ձեռք բերելու համար: Ես այդ գումարները չեմ տվել, որ Աշոտն իր սեփական կարիքները հոգա: Նա իմ իրավաբանին կաշառելով, այդ գործարքներն արել է: Ես փողերս տվել են հայրենիքին ծառայեցնելու համար, ոչ թե հարյուր տեղ բաժանելու, Կիպրոս ուղարկելու համար»:
Տաթև ՀԱՐՈՒԹՅՈՒՆՅԱՆ
