Այսօր ԱԺ արտահերթ նիստում մի շարք կարեւոր օրենքների քվեարկությունն անցավ բազմաթիվ խախտումներով:
Հայտնի է, որ ՀՀԿ խմբակցության պատգամավորներից շատերը այսօրվանից մեկնել են մարզեր՝ քարոզարշավի: Եվ չնայած ՀՀԿ խմբակցության ղեկավար Վահրամ Բաղդասարյանը վստահեցրեց, որ նրանք նիստերին գալու են, ժամը 6-ից հետո են գնալու, փաստն այն է, որ այսօր հաշված թվով պատգամավորներ էին ներկա եւ օրենքները անցկացնելու խնդիր ուներ իշխանությունը:
Մեր տեսախցիկն արձանագրեց, թե ինչպես է ՀՀԿ-ն անցկացրել կառավարության բերած օրինագծերը՝ քվեարկելով ուրիշների փոխարեն: Գեներալ Մանվելի փոխարեն քվեարկում էր մեկ Սեյրան Սարոյանը, մե՛կ Ալեքսան Պետրոսյանը, սյունեցի պատգամավոր Արմեն կարապետյանը քվեարկում էր իր եւ իր կողքի պատգամավորների փոխարեն, որոնք բացակայում էին:
Կարդացեք նաև
Հաշվի առնելով, որ ՀՀԿ-ականների երկու ձեռքը չի բավարարի քվեարկել բոլոր բացակաների փոխարեն, օգնության հասավ ԲՀԿ-ն՝ դակելով օրենքները:
ԲՀԿ խմբակցության պատգամավորներ Հրանտ Դավթյանն ու Արշակ Մխիթարյանը, օրինակ, քվեարկեցին 4 հոգու փոխարեն:
Իսկ այդ ընթացքում ընդունվեցին «Հարկերի մասին», «Կենտրոնական բանկի մասին», «Առեւտրի եւ ծառայությունների մասին», «Սահմանամերձ գյուղական համայնքներում իրականացվող գործունեությունը հարկերից ազատելու մասին», Դատական օրենսգրքում եւ մի շարք այլ օրենքներում փոփոխություններ եւ լրացումներ կատարելու մասին նախագծերը:
Հռիփսիմե ՋԵԲԵՋՅԱՆ
