Տրանսպորտի եւ կապի նախարարության առաջարկով Ռուսաստանի Տուլայի մարզում նոյեմբերի 3-ին վթարի ենթարկված ավտոբուսի ուղեւորներին եւ նրանց ընտանիքներին կառավարության այսօրվա նիստում գործադիրը 50 միլիոն դրամ հատկացրեց:
Տրանսպորտի եւ կապի նախարար Գագիկ Բեգլարյանը ներկայացնելով նախագիծը, հայտնեց, որ զոհվածներից յուրաքանչյուրի ընտանիքին կհատկացվի մեկուկես միլին դրամ (ավելի վաղ հայտարարվել էր 1 միլիոն դրամի մասին), իսկ վիրավորում ստացած ուղեւորներին կհատկացվի 700 հազարական դրամ օգնություն:
Ավտոբուսի մյուս ուղեւորները նույնպես դրամական օգնություն կստանան՝ 500 հազարական դրամ:
Կկազմակերպվի Ռուսաստանի հիվանդանոցներում բուժում ստացող անձանց վերադարձը Հայաստան, իսկ անհրաժեշտության դեպքում հուղարկավորությունների համար կտրամադրվեն սգո պարագաներ եւ տրանսպորտային միջոցներ:
Վարչապետ Հովիկ Աբրահամյանը հրապարակավ շնորհակալություն հայտնեց ՌԴ կառավարության ղեկավար Դմիտրի Մեդվեդեւին, տրանսպորտի նախարարին, Տուլայի նահանգապետին եւ բուժանձնակազմին՝ տուժած քաղաքացիներին ամեն կերպ օժանդակելու համար: Օպերատիվ աշխատանքի համար նա շնորհակալություն հայտնեց նաեւ Գագիկ Բեգլարյանին ու առողջապահության նախարար Արմեն Մուրադյանին:
Նելլի ԲԱԲԱՅԱՆ
