Ինչպես տեղեկացրել ենք, կառավարությունը ԱԺ է բերել մի նախագիծ, որով ուզում է 2016-ի հունվարի 1-ից բարձրացնել դատախազության աշխատակիցների աշխատավարձերը, ինչը դժգոհություն առաջացրեց ընդդիմադիրների շրջանում:
ՕԵԿ խմբակցության ղեկավար Հեղինե Բիշարյանի խոսքերով՝ գոնե հիմա չբերեին, երբ նոր է քննարկվել հանձնաժողովներում 2016-ի աղքատ պետբյուջեի նախագիծը եւ գիտենք, թե ինչ դժվար տարի է մեզ սպասվում հաջորդ տարի. «Մեր բոլոր առաջարկությունները չեն ընդունել, որովհետեւ փող չկա, հիմա նոր նախագիծ են բերել, որը ֆինանսական լրացուցիչ ծախս է պահանջում»: Նա հետաքրքրվեց՝ ի՞նչ ծախս է դա ենթադրում պետբյուջեի վրա եւ ինչո՞ւ նախկինում չէին փորձել գործակիցները համապատասխանեցնել, որ հիմա խնդիր չլիներ աշխատավարձերը բարձրացնել՝ համապատասխանեցնելով իրար:
Արդարադատության փոխնախարար Արսեն Մկրտչյանը համաձայնեց, որ լավ կլիներ՝ աշխատավարձերի այդ շեղումը շուտ նկատեին եւ բացահայտեին. «Այդ շեղումը, ըստ էության էական չէ: Ընդհանուր առմամբ լրացուցիչ բյուջետային ծախս կառաջացնի մոտ 311 մլն-ի չափի գումար»:
Հեղինե Բիշարյանն արձագանքեց՝ դա հսկայական ծախս է. «Մենք այսօր խնդրում էինք, որ չաշխատող մայրերի երեխայի նպաստները տան, պատճառաբանում, կուրծք են ծեծում, որ մենք փող չունենք: Հիմա որ այդ 311 մլն-ը ուղղորդեինք նրանց՝ հազար անգամ ճիշտ կլիներ»:
Կարդացեք նաև
Փոխնախարարն էլ պատասխանեց, թե պետք չի նվազեցնել դատախազության աշխատակիցների ռիսկային գործոնները:
Հռիփսիմե ՋԵԲԵՋՅԱՆ
