Կառավարությունը ԱԺ է բերել եւ հրատապ կարգով ուզում է ընդունել «Պետական պաշտոններ զբաղեցնող անձանց վարձատրության մասին» ՀՀ օրենքում փոփոխությունների նախագիծը:
Արդարադատության նախարարի առաջին տեղակալ Արսեն Մկրտչյանը նախագիծը ներկայացնելիս ասաց, որ առաջարկում են բարձրացնել մասնավորապես դատախազության աշխատակիցների աշխատավարձը, որպեսզի համապատասխանեցնեն Վճռաբեկ դատարանի աշխատակիցների եւ Քննչական ծառայության աշխատակիցների աշխատավարձերի հետ:
ԲՀԿ խմբակցության պատգամավոր Տիգրան Ուրիխանյանը պոռթկաց. «Ախր էս ոնց որ ինադու լինի, ես անընդհատ լսում եմ՝ պետական պաշտոնյաների աշխատավարձի բարձրացում, նյարդերս նյարդայնանում են: Հնարավոր չէ՞ գոնե այս ընթացքում զերծ մնալ դրանից, կարո՞ղ ենք այս հարցը հետաձգել կամ ընդհանրապես հանել շրջանառությունից: Ժամանակը չի, փող չկա: Սոցիալական ծախսերի համար փող չկա, մանկավարժներին գումար չկա, պետական պաշտոնյաներին ամեն ինչ կա՞: Լավ, դատախազներինն է՞լ»:
Փոխնախարարը պատասխանեց, որ պետբյուջեի պլանավորման մեջ կա աշխատավարձերի այս բարձրացումը: Այն առաջարկվում է ուժի մեջ մտցնել 2016-ի հունվարի 1-ից:
Կարդացեք նաև
Ըստ Տիգրան Ուրիխանյանի, սխալ է դատախազների աշխատավարձը հիմա բարձրացնել, նրանք ցածր սոցիալական խավի ներկայացուցիչներ չեն: Հրատապության ռեժիմը փոխեք, միջոց գտեք: Լավ, սա ի՞նչ է ճակատագրի իռոնիա՞ է:
Փոխնախարարը պատասխանեց, որ հրատապ ռեժիմը չեն փոխի:
Նաիրա Զոհրաբյանի խոսքերով՝ երբ ժամանակին դատավորների, դատախազների աշխատավարձերը փուլ առ փուլ բարձրացնում էին, պատճառաբանում էին, որ միջազգային կառույցների հորդորով է, որ այդ ոլորտում կոռուպցիան կանխեն, բայց տպավորություն է, որ ինչքան շատ են աշխատավարձերը բարձրացնում դատավորների, այնքան շատ են մարդիկ բողոքում արդարադատությունից. «Մեկ դրամ անգամ բարձրացնել հատկապես իրավական համակարգի աշխատողների աշխատավարձերը, երբ հանրությունը դժգոհ է հատկապես այդ համակարգից, սա լուրջ սոցիալական դժգոհության ալիք է բարձրացնելու: Մեր հանրությունը ուղղակի զզված է դատարաններում տիրող իրավիճակից, արդարադատության համակարգից: Դուք հրահրելու եք հանրային հերթական դժգոհությունը»:
Արսեն Մկրտչյանը պատասխանեց, որ աշխատավարձերի բարձրացման անհրաժեշտությունը կառավարությունը տեսնում է:
Հռիփսիմե ՋԵԲԵՋՅԱՆ
