«Քեսաբում վերջին ժամանակաշրջանում բնակչությունն ավելացել է ի հաշիվ Հալեպից այնտեղ գնացած հայերի, քանի որ ռուսական օդուժի միջամտությունից հետո իրավիճակը Քեսաբում փոքր-ինչ կայունացել է։ Մոտ հազար սիրիահայ է վերադարձել Քեսաբ»,- այսօր լրագրողների հետ հանդիպման ժամանակ ասաց պատմաբան Գևորգ Յազըճյանը:
Նրա փոխանցմամբ՝ Հալեպի 45-50 հազարանոց հայկական համայնքի միայն կեսն է այժմ մնացել այնտեղ: 15-17 հազար սիրիահայեր տեղափոխվել են Հայաստան, գրեթե նույնքան էլ՝ Բեյրութ:
Ինչ վերաբերում է սիրիահայերի՝ Հայաստանում մնալ-չմնալուն, Գ. Յազըճյանն ասաց, որ նրանց զգալի մասն այստեղ հաստատվել է հայրենասիրական մղումներից, նաև՝ Սիրիայում այլևս հեռանկար չտեսնելու խնդրից ելնելով. «Որոշ մասն էլ նախընտրում է Թուրքիան (բնական է, որ այդպիսի մարդիկ էլ պիտի լինեին)։ Եվ կան սիրիահայեր, որոնք սպասում են իրենց վիզաներին՝ Հայաստանից հեռանալու և որևէ օտար երկրում հանգրվանելու համար»:
Գ. Յազըճյանի տեղեկություններով՝ հակամարտության ընթացքում Սիրիայի հայկական համայնքն ունեցել է մոտ 60 զոհ:
Կարդացեք նաև
Թեև իրավիճակը Սիրիայում զգալիորեն փոխվել է, բայց թե երբ և ինչպես կավարտվի հակամարտությունը, պատմաբանը դժվարանում է կանխատեսումներ անել. «Սիրիական բանակն այնքան արդյունավետ չի գործում, որքան կարելի էր սպասել: Դրա համար կան գաղափարական պատճառներ»,- կարծում է Գ. Յազըճյանը:
Նրա գնահատմամբ՝ Սիրիայում, ինչպես և Իրաքում, միլիոնավոր մարդիկ այսօր ծայրահեղական իսլամի գաղափարներով են տարված. «Ռուսական օդուժն ու սիրիական բանակը կարող են հաջողությունների հասնել, բայց պատերազմի հանգուցալուծման համար այդ մարդկանց պետք է առաջարկել նաև նոր գաղափարախոսություն, որը կհամապատասխանի նրանց կրոնական պատկերացումներին ու աշխարհընկալմանը»:
Սիրանուշ ՀԱՅՐԱՊԵՏՅԱՆ
