Հատված ԱԺ ՀՀԿ խմբակցության անդամ Խոսրով Հարությունյանի հարցազրույցից:
– «Ոչ»-ի ճակատի քարոզարշավն ինչպե՞ս եք գնահատում։
– «Այո» ասողներին հասկանում եմ՝ ինչու են «այո» ասում, բայց հակառակ կողմում հայեցակարգային, իրավական, քաղաքական լուրջ, ծանրակշիռ հակափաստարկ չեմ տեսնում։ Ասում են, թե սա բերելու է Սերժ Սարգսյանի իշխանության վերարտադրությանը, երբ հարցնում ես՝ ինչպե՞ս, բացատրություն չկա։ Մեր պրակտիկան ցույց է տալիս, որ համամասնական ընտրական համակարգով ընտրությունների արդյունքում նույնիսկ ամենաազդեցիկ քաղաքական ուժը 35 տոկոսից ավելի ձայն չի կարող հավաքել։ Եթե կարողանային հավաքել, վաղուց մեծամասնական ընտրական համակարգը վերացրած կլինեին։
Այս սահմանադրությունն առաջարկում է հետևյալը. գնացեք համամասնական ընտրությունների, եթե ընդդիմության չսիրած ՀՀԿ-ն հավաքեց 40 տոկոս, ժողովրդի սիրած ընդդիմությանը բաժին է հասնելու 60 տոկոսը։ Նոր սահմանադրությունն ասում է՝ պարոնայք ընդդիմություն, կոալիցիա կազմեք և ձևավորեք կառավարություն։ Ասացեք, խնդրեմ, որտե՞ղ տեսաք Սերժ Սարգսյանի վերարտադրությունը։ Եթե դուք իրար հետ չեք կարող լեզու գտնել, ի՞նչ կապ ունի այստեղ Սերժ Սարգսյանը։ Առայսօր «Ոչ»-ի ճակատից ոչ մի լուրջ հակափաստարկ չեմ լսել, բացի ատելությունից, անձնական լուտանքից։
Կարդացեք նաև
– Սահմանադրության նոր նախագծով մեծացել է ընդդիմության լիազորությունների շրջանակը։ Ուրեմն ինչո՞ւ վերջիններս դեմ են դրան ու չեն հավատում այս դրական տեղաշարժին։
– Կարևորագույն պաշտոնյաներին ընտրում է խորհրդարանը 3/5-ով, այսինքն՝ դու չես կարող մեծամասնությամբ քո նախընտրած գլխավոր դատախազն ունենալ։ Ուզած– չուզած ընդդիմության հետ հաշվի ես նստելու։ Սա նշանակում է քաղաքական որոշումներում մեծացնել ընդդիմության դերակատարումը։ Սա է կառուցողական ընդդիմություն ձևավորելու լավագույն հնարավորությունը։ Ընդդիմություն, որը ոչ թե լավ հայհոյում է, այլ ընդդիմություն, որն ունի հանրային կյանքը կազմակերպելու սեփական տեսլականը։ Այլ խոսքով, ընդդիմությունն իշխանության հետ երկիրը կառավարելու համատեղ պատասխանատվություն է ստանձնում։ Իմ պատկերացմամբ, մեր ընդդիմադիրները սրան պատրաստ չեն։ Նրանց ձեռնտու է այս վիճակը, հայհոյել ու ոչ մի բանի համար պատասխանատվություն չկրել։
Ռուզան ԽԱՉԱՏՐՅԱՆ
Հոդվածն ամբողջությամբ կարող եք կարդալ «Իրատես de facto» թերթի այսօրվա համարում
