«Հայաստանում ընտրությունների ինստիտուտը ոչնչացվել է. Հայաստանում բոլոր ընտրությունները կեղծվում են»,- նոյեմբերի 9-ին Կովկասյան աշխարհաքաղաքական ակումբի կազմակերպած հայ-ռուսական կլոր սեղանի ընթացքում ասաց ԱԺ պատգամավոր Լեւոն Զուրաբյանը:
Նա նշեց, որ ընտրությունները կեղծելու մասշտաբը այնքան մեծ է, որ երաշխավորում է ընտրություններում իշխանությունների հաղթանակը: Նրա խոսքերով՝ Հայաստանում՝ անկախությունից հետո, ժողովրդագրական բոլոր ցուցանիշները նվազելու միտում ունեն՝ բացի ընտրողների պաշտոնական թվից, որը գնալով աճում է: Նա համարում է, որ այդ մարդկանց թվի աճն է ընտրակեղծիք ապահովում:
«Եթե Սահմանադրությունը չփոխվի, ապա Սերժ Սարգսյանը պետք է գնա, ոչ մի ընտրակեղծիք չի օգնի: Դա միակ պատճառն է, որ նա սահմանադրական փոփոխություններ է նախաձեռնել՝ Հայաստանի կառավարման համակարգ կիսանախագահականից, որը գործում է Ռուսաստանում, Ֆրանսիայում, փոխելով խորհրդարանականի»,- ասաց նա:
Լեւոն Զուրաբյանը նկատեց, որ Սերժ Սարգսյանը միշտ խորհրդարանական կառավարման հակառակորդներից է եղել. «Զարմանալի չէ, որովհետեւ Հայաստանը ազգային անվտանգության առումով խոցելի վիճակում է գտնվում, եւ այս իրավիճակում անցումը նախագահականից խորհրդարանական կառավարման համակարգին բացահայտում է այդ խոցելի իրավիճակը եւ շատ խնդիրներ է ստեղծում զինված ուժերի արդյունավետ կառավարման համար»:
Կարդացեք նաև
Նա համարում է, որ քաղաքական խաղի կանոնները փոխել չի կարելի, եւ Սահմանադրությունը նրա համար է, որ էլիտան ենթարկվի, այլ ոչ թե փոփոխի եւ իրեն ենթարկի. «Մենք համոզված ենք Հայաստանի խնդիրներից եւ ոչ մեկի լուծումը, ես ի նկատի ունեմ կոռուպցիան, մենաշնորհը, կեղծիքները, խնդիր չի դնում Սահմանադրություն փոխել: Այս խնդիրների լուծումներից եւ ոչ մեկը կախված չէ Սահմանադրությունից: Իրականում, եթե Սահմանադրությունը գործի, երկրում արդար ընտրություններ անցկացվեն, այս բոլոր խնդիրները կլուծվեն»:
Ամի ՉԻՉԱԿՅԱՆ
