Հեպատիտի բուժումը դարձյալ պետպատվերով չի իրականացվի: Այսօր այս մասին, խորհրդարանում շարունակվող 2016 թվականի բյուջեի նախագծի քննարկումների ժամանակ, հայտարարեց ՀՀ առողջապահության նախարար Արմեն Մուրադյանը` պատասխանելով ԲՀԿ-ական պատգամավոր Էլինար Վարդանյանի հարցին: Նախարարն ասաց, որ հեպատիտ B և C հիվանդության բուժումը պահանջում է խոշոր գումարներ, որոնք կառավարությունը չի կարող ապահովել բյուջեով:
Նախարարը մանրամասնեց, որ այդ հիվանդության բուժումը 15-20 հազար դոլար արժե, կան նաեւ դեղեր, որոնցով բուժումը նույնիսկ 180 հազար դոլարի է հասնում. «Մենք փորձում ենք ներգրավվել միջազգային ինչ-որ ծրագրերում, որոնք հնարավորություն կտան այս հիվանդության բուժման համար ինչ-որ քանակությամբ արդյունավետ դեղեր ստանալ»:
Էլինար Վարդանյանին չգոհացրեց նախարարի պատասխանը: «Որքան էլ թանկ լինի, պետությունը պիտի մտածի իր քաղաքացիների մասին»,- ասաց նա:
Նելլի ԳՐԻԳՈՐՅԱՆ
