Արդեն երկրորդ տարին է՝ Հայաստանում կազմակերպվում է հնդկական ապրանքների ցուցահանդես-վաճառք: Հայաստան-Հնդկաստան գործարար կամուրջ ծրագրի շրջանակներում «Հնդկաստանի շունչը Հայաստանում» խորագրով ցուցահանդեսը մեկնարկեց Էջմիածին քաղաքում:
Մեկ շաբաթվա ընթացում արմավիրցիները հնարավորություն ունեն ձեռք բերել հնդկական համեմունքներ, օծանելիք, հագուստ, կահույք,ինչպես նաև հնդկական արվեստի որոշ նմուշներ: Ցուցահանդեսը կազմակերպվել է «Little India» ընկերության կողմից: Ծրագրին աջակցել է նաև Էջմիածնի քաղաքապետարանը:
«Little India» ընկերության տնօրենը` Նավեթ Խանը, Aravot.am-ի հետ զրույցում ասաց. «Մենք երկրորդ անգամ ենք Հայաստանում նման ցուցահանդես- վաճառք կազմակերպում: Առաջին անգամ Երևանում ենք անցկացրել, որը բավականին դրական արձագանքներ ունեցավ: Էջմիածնում էլ կազմակերպվեց, որովհետև մարդիկ անընդհատ զանգահարում էին, և շատ էին ցանկանում, որ հնդկական ապրանքները վաճառվեն նաև այստեղ: Նոյեմբերի 4-11-ը մենք տալիս ենք նման շանս: Էջմիածինցիները բավականին հետաքրքրված են հնդկական մշակույթով»:
Նավեթ Խանը իր խոսքում ասաց նաև, որ մեծ տեսականին ու Հնդկաստանի շունչը տեղափոխելով Էջմիածին՝ փորձում են ավելի ջերմացնել հայ-հնդկական հարաբերությունները: «Անընդհատ մարդկանց հոսքը հաճելի է մեզ բոլորիս: Իսկապես շատ կարևոր է, որ նկատվում է հասարակության շրջանում ցանկություն` ծանոթանալ հնդկական մշակույթին: Մարդիկ մոտենում են, հարցեր են տալիս, ճաշակում են մեր ուտեստներն, նաև գնումներ են կատարում»:
Կարդացեք նաև
«Մենք առաջարկում ենք ամեն ինչ: Փոքրիկ Հնդկաստան ենք կարծես հիմնել: Շնորհակալ ենք Էջմիածնի քաղաքային իշխանությանը մեզ աջակցելու համար: Բնականաբար՝ այն ակտիվությունը, որ մայրաքաղաքում կար, այստեղ ավելի պակաս է: Բայց մեզ համար կարևոր է լավ հարաբերություններ ունենալ բոլորի հետ: Մենք էլ սիրեցինք Էջմիածինն այնքան, ինչքան նրանք մեր ապրանքները»,-նկատում է Նավեթ Խանը:
Հայկ ՄԱԳՈՅԱՆ
