ՀՀԿ ԳՄ նիստն այսօր վարել է ՀՀ նախագահը, անդրադարձել են դեկտեմբերի վեցին նախատեսված սահմանադրական փոփոխությունների հանրաքվեին, շտաբերի աշխատանքների կազմակերպչական ու բովանդակային խնդիրներին:
Նիստից հետո ՀՀԿ փոխնախագահ Արմեն Աշոտյանը գրեթե նույն կերպ պատասխանեց լրագրողների բոլոր հարցերին:
Սերժ Սարգսյանը կմասնակցի՞ հանրաքվեի քարոզարշավին հարցին, պարոն Աշոտյանն ասաց. «Այդ հարցը չի քննարկվել»:
Մեկ այլ հարցի, թե «Նոր Հայաստան» հանրային փրկության ճակատը շրջում է մարզերով եւ ժողովրդին անհնազանդության կոչեր անում, որպեսզի դեկտեմբերի մեկին իրականացնեն իշխանափոխություն, ձեզ չե՞ն մտահոգում այդ գործողությունները, պարոն Աշոտյանը արձագանքեց. «Բնականաբար, այդ հարցը մենք չենք քննարկել, այն կուսակցական գործառույթներից դուրս է, բայց «ոչ»-ի ճակատը ուժեղացնում եւ լեգիտիմացնում է «այո»-ն: Մնացած գործողությունները պետք է համադրելի լինեն Հայաստանի օրենսդրությանը»:
Կարդացեք նաև
ԿԳ նախարարը նաեւ հավելեց, թե ամեն ինչ անում են, որ սահմանադրական փոփոխությունների քարոզարշավը լինի ապագային միտված, քաղաքացիների ընտրությունը կատարվի հնարավորինս իրազեկված ու լինի գիտակցական ընտրություն:
Արփինե ՍԻՄՈՆՅԱՆ
