ԵԽԽՎ քաղաքական հանձնաժողովի երեկ ընդունած բանաձեւը ԱԳ փոխնախարար Կարեն Նազարյանը չի համարում Հայաստանի հերթական դիվանագիտական ձախողումը: «Հայտնի է, որ զեկուցող Ուոլթերն ընդգրկված է Ադրբեջանի խավիարային դիվանագիտության ցանկում և այստեղից կարող եք եզրակացություններ անել»,- այսօր խորհրդարանում, լրագրողների հետ զրույցում ասաց նա:
Հիշեցնենք, որ երեկ Փարիզում տեղի ունեցած ԵԽԽՎ քաղաքական հանձնաժողովի նիստի ժամանակ ընդունվել է բրիտանացի պատգամավոր Ռոբերտ Ուոլթերի հեղինակած «Բռնության աճը Լեռնային Ղարաբաղում եւ Ադրբեջանի մյուս գրավյալ տարածքներում» զեկույցը: Շատ հավանական է, որ այն հունվարին, ԵԽԽՎ լիագումար նիստի ժամանակ եւս կընդունվի:
«ԵԽԽՎ-ում մեր գործունեությունը խորհրդարանական ձևաչափ է: Այնտեղ հանդես է գալիս խորհրդարանական պատվիրակությունը, ԱԳՆ-ն այս գործընթացում ներգրավված է միայն խորհրդակցական կարգավիճակով: Խորհուրդ կտայի սպասել. պատվիրակության ղեկավարը շուտով կվերադառնա և կտա պատասխանները»,- ասաց Կարեն Նազարյանը:
ԱԳ փոխնախարարը նկատեց, որ այս գործընթացը որեւէ կերպ չի կարող ազդել ՀՀ-ԵՄ դեկտեմբերին մեկնարկելիք բանակցությունների վրա: Նա հույս ունի, որ ԵԽԽՎ հայաստանյան պատվիրակությունը այս առիթով քայլեր կձեռնարկի, քանի որ Ուոլթերը ով մի քանի ամսից վայր է դնելու մանդատը եւ ցավալի է, որ նման ժառանգություն է թողնում:
Փոխնախարարը չմեկնաբանեց ՀԱԿ պատգամավոր Լևոն Զուրաբյանի հայտարարությունն այն մասին, որ եթե լիներ ազգային քաղաքականությունը, չէր լինի նման պարտություն: «Ռազմավարություն մշակելուն դեմ չեմ, վստահ եմ՝ նման բան եղել է և ԱԳՆ-ին ուղղված բոլոր հարցերին մենք տվել են սպառիչ պատասխաններ»,- միայն ասաց նա:
Կարդացեք նաև
Նելլի ԳՐԻԳՈՐՅԱՆ
