Այսօր ԱԺ հանձնաժողովների համատեղ նիստում շարունակվում են 2016-ի բյուջեի նախագծի քննարկումները: Ֆինանսների փոխնախարար Պավել Սաֆարյանը ներկայացրեց Մարդու իրավունքների պաշտպանի գրասենյակին նախատեսված հատկացումները եւ ծախսերը:
2016-ի համար նախատեսվել է օմբուդսմենի գրասենյակին տրամադրել 256 մլն դրամ, որը 7 մլն-ով ավելի է, քան անցյալ տարվա հատկացումներն են: Այն նախատեսվել է աշխատավարձի բնականոն աճի եւ էլեկտրաէներգիայի ծախսի համար:
Ուշագրավ է, որ ամեն տարի Կարեն Անդրեասյանն էր ներկայացնում բյուջեի նախագիծը, այս տարի նրա փոխարեն եկել էր աշխատակազմի ղեկավար Տիգրան Արեյանը:
Սա բարկացրեց ներկա պատգամավորներին, Կարեն Անդրեասյանի պահվածքը կապվեց ԱԺ-ում հայտնի վիճաբանության հետ:
Կարդացեք նաև
ԱԺ Մարդու իրավունքների եւ հանրային հարցերի հանձնաժողովի անդամ Ալեքսանդր Արզումանյանը հարցրեց. «Ես որեւէ կասկած չունեմ, որ կարող եք հարցերին պատասխանել, բայց ինչու չի մասնակցում Կարեն Անդրեասյանը: Մեր հանձնաժողովը բավականին բարյացակամ վերաբերմունք է դրսեւորել պարոն Կարեն Անդրեասյանի նկատմամբ»:
Նա հիշեցրեց, որ հանձնաժողովը միջնորդել է եւ Պավել Սաֆարյանն ասել է, որ հավելյալ գումարներ տրամադրեն. «Մեզ համար անընդունելի է, երբ գերատեսչության ղեկավարը չի գալիս: Բացառիկ դեպքեր լինում են, օրինակ, արտգործնախարարի դեպքում, որը ունենում է նախապես գրաֆիկ, որը խախտել չի կարելի: Բայց Կարեն Անդրեասյանը Հայաստանում է եւ անընդունելի է նրա վերաբերմունքը»:
Նա անհարգալից վերաբերմունք որակեց Կարեն Անդրեասյանի արածը. «Անկախ մարմին լինել՝ չի նշանակում, որ պետք է որեւէ մեկի հետ չհամագործակցես: Սա օրիորդաց վարժարան չէ, որ ինչ-ինչ բաներից նեղացածություն լինի եւ դեմարշներ հրավիրեն: Տարին 3 անգամ է լինում, որ պետք է ԱԺ գալ: Այդ 3 անգամն այնպես արեք, որ չբացակայեք»:
Հանձնաժողովի նախագահ Էլինար Վարդանյանը միացավ Ալեքսանդր Արզումանյանին՝ ասելով, որ Մարդու իրավունքների պաշտպանության հանձնաժողովն ամեն ինչ արել է, որ համագործակցությունը կայանա, եւ այսօր Կարեն Անդրեասյանի բացակայությունը հարց է առաջացնում՝ արդյոք այդ համագործակցությունը փոխադա՞րձ է. «Սա ԱԺ-ն է եւ պահանջում է պատշաճ վերաբերմունք բոլոր գերատեսչությունների կողմից: Հարգանքը ԱԺ-ի նկատմամբ ենթադրում է փոխադարձ վերաբերմունք»:
Օմբուդսմենի աշխատակազմի ղեկավարը փորձեց Կարեն Անդրեասյանին արդարացնել. «Քանի որ ֆինանսատնտեսական բյուջետային հարցեր էր քննարկվում եւ քանի որ կառավարությունը ոչ մի անհամաձայնություն չէր հայտնել, այդպիսի որոշում կայացվեց: Այնպես որ, դա մի որակեք որպես անհարգալից վերաբերմունք»:
Ալեքսանդր Արզումանյանը հեգնեց՝ ուրեմն հաշվապահին ուղարկեիք, նախարարներն էլ չեն զբաղվում ֆինանսական հարցերով:
Հռիփսիմե ՋԵԲԵՋՅԱՆ
