Արդարադատության նախարար Արփինե Հովհաննիսյանը երեկ ԱԺ-ում 2016-ի բյուջեի նախագծի քննարկման ժամանակ ասաց, որ իրենց նախարարությանը հատկացված միջոցները նախորդ տարվա համեմատ կրճատվել են:
«Առավոտը» հետաքրքրվեց՝ խնայողություններ պատրաստվո՞ւմ եք անել, որովհետեւ շատ են քննադատում, որ նախարարությունները ուռճացնում են ծախսերը, պահում են մի քանի տեղակալներ, տեղակալների քարտուղարուհիներ եւ այլն, նա պատասխանեց. «Բնականաբար, եթե խնայողությունների հնարավորություն լինի օբյեկտիվորեն, մենք դա անելու ենք»: Մենք ճշտեցինք՝ բայց տեսնո՞ւմ եք ուռճացված ծախսեր նախարարությունում, Արփինե Հովհաննիսյանը պատասխանեց, որ ընդհանրապես նախարարության եւ դրա առանձին կառույցների գործունեության արդյունավետության մասին գնահատական կտա ավելի ուշ. «Բայց ցանկացած դեպքում այդպիսի որակումները համընդհանուր, բոլորին վերաբերող չպիտի լինեն: Կլինեն տեղեր, որտեղ կլինեն ուռճացված ծախսեր, կլինեն նախարարություններ, որ չեն ունենա: Մենք, ինչու ոչ, կարիք ունենք կադրերի ավելացման, այնպես չի, որ միանշանակ ամեն ինչ ուռճացված է: Նախարարության աշխատակազմում երկու կողմով էլ կարելի է հարցերը դիտարկել»:
Մենք հետաքրքրվեցինք՝ Դուք քանի՞ տեղակալ ունեք, նրանց քարտուղարուհիները շա՞տ են: Նախարարը պատասխանեց. «Ունեմ 4 տեղակալ, նրանցից յուրաքանչյուրն ունի ընդամենը 1 օգնական: Այդ օգնականը նույն քարտուղարուհի կոչվածն է, որը կատարում է ամբողջ փաստաթղթաշրջանառությունը եւ ընդհանրապես ամեն ինչ: Այսինքն՝ այնպես չի, որ լրացուցիչ քարտուղարուհի են բերում»:
Հ. ՋԵԲԵՋՅԱՆ
«Առավոտ» օրաթերթ
04.11..2015
