Վարկն ուղղվելու է կարճաժամկետ եւ միջնաժամկետ ռիսկերի չեզոքացմանը
Հայաստանը, ավելի ճիշտ՝ ՀՀ յուրաքանչյուր քաղաքացի կրկին վարկային բեռի տակ է ընկնում:
Կառավարությունը 300 միլիոն դոլարի վարկ կստանա Եվրասիական տնտեսական ընկերակցության հակաճգնաժամային հիմնադրամից: Վաղը կառավարության նիստին վարկ ստանալու մասին նախագիծը հավանության կարժանանա:
Ըստ նախագծի, Հայաստանի Հանրապետության եւ Եվրասիական զարգացման բանկի միջեւ Եվրասիական տնտեսական ընկերակցության հակաճգնաժամային հիմնադրամի միջոցներից ֆինանսական վարկի տրամադրման մասին» համաձայնագրով նախատեսվում է ՀՀ-ին տրամադրել 300 միլիոն ԱՄՆ դոլարի չափով բյուջետային աջակցության վարկ, որը կտրամադրվի 3 մասնաբաժիններով՝ յուրաքանչյուրը 100 մլն ԱՄՆ դոլար գումարով: Վարկի տարեկան տոկոսադրույքը կազմում է 2,1%, տրամադրվում է 20 տարի մարման ժամկետով, որից 10 տարին արտոնյալ ժամանակահատվածն է»: Վարկի նախապայմանը, ինչպես գրված է նախագծում, ՀՀ կառավարության եւ ՀՀ կենտրոնական բանկի (ԿԲ) կողմից բարեփոխումների ծրագրի իրականացումն է: «Ծրագրով նախատեսված
տնտեսական, հարկաբյուջետային եւ դրամավարկային քաղաքականության միջոցառումներն ուղղված են հիմնական կարճաժամկետ եւ միջնաժամկետ ռիսկերի չեզոքացմանը, ինչպես նաեւ տնտեսական աճի ավելի բարձր տեմպերի ապահովման գործում խոչընդոտների վերացմանը: Միջոցառումներն ուղղված են ինչպես ՀՀ տնտեսության առանձին տարրերի կայունացմանը (էներգետիկ, շինարարական, բյուջետային հատվածներ), այնպես էլ՝ ներքին եւ արտաքին տնտեսական կապերի ընդհանուր, երկարաժամկետ եւ կառուցվածքային ամրապնդմանը»,-վստահեցնում է ֆինանսների նախարար Գագիկ Խաչատրյանը՝ կառավարություն ներկայացված նախագծով:
Ուշագրավ են ծրագրի գլխավոր ուղղությունները՝ էներգետիկ հատվածի ֆինանսական կայունության բարձրացում, պետական ֆինանսների կառավարման արդյունավետության բարձրացում, բիզնեսի վարման պայմանների բարելավում:
Նելլի ԲԱԲԱՅԱՆ
