Նոյեմբերի 7-11-ը Երևանում, ՀՀ մարզերում, Արցախում և Ջավախքում կանցկացվի «Ռոլան» մանկապատանեկան ֆիլմերի 11-րդ միջազգային փառատոնը, որն այս տարի նվիրված է Հայոց ցեղասպանության 100-րդ տարելիցին:
Փառատոնի ավանդական 7 անվանակարգերին այս տարի ավելացել է ևս մեկը՝ «Ապագա՝ առանց Ցեղասպանության» խորագրով հատուկ ոչ մրցութային անվանակարգը, որտեղ ներկայացվելու են ոչ միայն հայ, այլև այլ ազգերի ցեղասպանությունների մասին պատմող ֆիլմեր:
Ընդհանուր առմամբ, փառատոնի այս տարվա ծրագրում ընդգրկված է 156 ֆիլմ՝ 44 երկրներից:
Փառատոնի բացմանը՝ նոյեմբերի 7-ին՝ ժամը 19-ին, «Մոսկվա» կինոթատրոնում կցուցադրվի ռեժիսոր Փոլ Քինգի բրիտանաֆրանսիական «Պադինգտոն» ֆիլմը, որի գլխավոր դերակատարներից մեկին մարմնավորում է Նիկոլ Քիդմանը:
Կարդացեք նաև
Փառատոնի փակման արարողությանը՝ նոյեմբերի 11-ին՝ ժամը 19-ին, «Մոսկվա» կինոթատրոնում կցուցադրվեն Սա Յեոնդոնգի «Հրում», Կոնստանտին Բոնզիտի «Առանց տիեզերքի ապրել չենք կարող» կարճամետրաժ անիմացիոն ֆիլմերը և Խավիեր Նավարոյի «Երազ տեսա» խաղարկային կարճամետրաժ ֆիլմը:
Նշենք, որ «Ռոլան» մանկապատանեկան ֆիլմերի միջազգային փառատոնն անցկացնում է Հայաստանի «Ռոլան Բիկով» հիմնադրամը՝ ՀՀ նախագահի, ՀՀ մշակույթի նախարարության և Երևանի քաղաքապետարանի աջակցությամբ:
«2006 թվականից փառատոնը, ընդլայնելով շրջանակները, Երևանից տեղափոխվեց մարզեր՝ վերջիններիս մշակութային կյանքի խթանման, մարզաբնակ երեխաների և պատանիների համար մշակութային անցուդարձին մասնակից լինելու պայմաններ ստեղծելու համար»,- այսօր լրագրողների հետ հանդիպման ժամանակ ասաց փառատոնի հիմնադիր տնօրեն, Հայաստանի «Ռոլան Բիկով» հիմնադրամի նախագահ Նունե Մանուկյանը՝ տեղեկացնելով, որ այս տարի փառատոնի մարզային փուլը կիրականացվի Շիրակի, Լոռու, Գեղարքունիքի և Տավուշի մարզերում:
2013 թվականից «Ռոլան Բիկով» հիմնադրամի և ՀՀ պաշտպանության նախարարության համագործակցության շնորհիվ ստեղծվել է «Պատիվ ունեմ» անվանակարգը, որի նպատակն է կինոյի միջոցով նպաստել բանակի մարտական ոգու բարձրացմանը: 2014-ին փառատոնին մասնակցել է 5 զորամաս, իսկ այս տարի ավելացել են ևս 3-ը:
Ն. Մանուկյանի փոխանցմամբ՝ փառատոնին հաջորդող 40 օրերի ընթացքում կկազմակերպվեն լավագույն ֆիլմերի ցուցադրություններ Արցախի բոլոր շրջաններում և Ջավախքում:
Փառատոնի շրջանակներում անցկացվում է նաև «Ես կօգնեմ» խորագրով բարեգործական ակցիան՝ ուղղված ՀՀ սահմանամերձ գյուղերում բնակվող անապահով ընտանիքների երեխաներին: «Այս բարի ակցիայի մասնակիցը կարող է դառնալ հանդիսատեսը՝ փառատոնի հինգ օրերի ընթացքում «Մոսկվա» կինոթատրոն այցելելիս իր հետ բերելով խաղալիքներ, մանկական գրքեր և այլ օգտակար իրեր ու դրանք թողնելով հատուկ այդ նպատակով նախատեսված արկղերում»,- ասաց Ն. Մանուկյանը՝ հորդորելով անհատներին, պետական կառույցներին, հիմնադրամներին, կազմակերպություններին, բոլոր նրանց, ովքեր սրտացավ են սահմանամերձ գյուղերում ապրող երեխաների համար, մասնակցել իրենց նախաձեռնած բարեգործական ակցիային և ժպիտ ու ջերմություն պարգևել այդ երեխաներին:
Ի դեպ, բարեգործական ակցիան կշարունակվի նաև կինոդիտումներից հետո՝ մինչև նոյեմբերի 27-ը. «Այս ընթացքում ցանկացողները կարող են հանգանակությունները բերել «Ռոլան Բիկով» հիմնադրամի գրասենյակ: Ակցիայի ավարտից հետո կորոշվի, թե ում են տրամադրվելու հավաքված նվերները»,- ասաց Հայաստանի «Ռոլան Բիկով» հիմնադրամի նախագահը:
Սիրանուշ ՀԱՅՐԱՊԵՏՅԱՆ
