«Նաիրի» կինոթատրոնում այսօր ամփոփվեց «Կինոաշուն» ծրագիրը, որի շրջանակում մեկ ամսվա ընթացքում Երեւանում եւ մարզերում ցուցադրվել են 180-ից ավելի ֆիլմեր: Ազգային կինոյի ամիսն այս տարի նվիրված էր Հայոց Ցեղասպանության 100-ամյակին. հանդիսատեսին ներկայացվել են վերջին տարիներին նկարահանված ցեղասպանության թեմայով գեղարվեստական եւ վավերագրական ֆիլմեր: Հայաստանի ազգային կինոկենտրոնի նախաձեռնությամբ իրականացվող ավանդական ծրագիրը սկսվել է Ստեփանավանից՝ ֆրանսահայ կինոռեժիսոր Ռոբեր Գեդիկյանի «Մի խելագարի պատմություն» ֆիլմով:
«Այս տարի մեծ ուշադրություն ենք դարձրել մարզերին: Սահմանապահ համայնքներում չնայած ցրտին եւ անձրեւին՝ մեր խմբերը ֆիլմերի ցուցադրություններ կազմակերպեցին, բնակիչներն էլ մեծ հաճույքով դիտեցին»,- ասաց Հայաստանի ազգային կինոկենտրոնի տնօրեն Գեւորգ Գեւորգյանը:
«Կինոաշունը» եղել է սահմանամերձ գրեթե բոլոր համայնքներում եւ կինոցուցադրությունները մշակութային տոնի վերածել: Մարտին Ուլիխանյանը, որը կազմակերպել է ցուցադրությունները, պատմեց, որ 4200 կմ-ից ավելի ճանապարհ են անցել. «Կարեւորն այն ոգեւորությունն էր, որը տեսնում էինք մարզերում: Երբ Դավիթ Բեկ գյուղում ցուցադրեցինք «Յարխուշտա» կինոնկարը, 6-րդ դասարանցի մի երեխա ասաց՝ «եթե նորից պատերազմ լինի, ես իմ հոր պես կգնամ սահման պահելու»…սա խոսում է կինոյի ուժի եւ մեր արվեստագետների աշխատանքի մասին: Իսկ Այգեպարի գյուղապետն առաջարկեց իր մեքենայով տեղաշարժվել, որպեսզի մեր փոխադրամիջոցը կրակոցների թիրախ չդառնա: Այ այսպիսի պայմաններում են ապրում մարդիկ եւ սահման պահում»:
Կարդացեք նաև
Մշակույթի փոխնախարար Արթուր Պողոսյանը փաստեց, որ «Կինոաշունը» մեծ պահանջարկ ունի. «Սա նշանակում է, որ մենք խնդիր ունենք կինոարվեստը հատկապես մարզերում ներկայացնելու եւ հանրահռչակելու: Մարզերից արձագանքը մեծ է: Մտավախություն կար, որ մարդիկ կնախընտրեն հեռուստացույցով ֆիլմ դիտել, բայց արձանագրեցինք հակառակը՝ հատկապես մարզերում սպասված են կինոդիտումները»:
Հավելենք, որ հայկական հին ու նոր խաղարկային, վավերագրական, անիմացիոն և մանկական ֆիլմերը ցուցադրվել են նաեւ Երևանի բոլոր համայնքներում, ուսումնական հատատություններում, կինոդահլիճներում ու զբոսայգիներում:
Լուիզա ՍՈՒՔԻԱՍՅԱՆ
