ԲՀԿ խմբակցության պատգամավոր Վահագն Մախսուդյանը «մի սայթում» կարդացել է, որ կան հատուկ խողովակներ, որոնք մանրաձուկը դաշտ չեն տանում: Այսօր խորհրդարանում 2016 թվականի բյուջեի քննարկումների ժամանակ նա այդ հարցը բարձրացրեց Ջրային պետական կոմիտեի բյուջեի քննարկման ժամանակ`դիմելով կոմիտեի ղեկավար Արամ Հարությունյանին: Խոսքը Սեւանից, ոռոգման նպատակով օգտագործվող ջրի մասին է, որը մղվում է պոմպակայաններ, ապա մատակարարվում գյուղացիական տնտեսություններին:
Պատգամավորը կարծում է, որ Արամ Հարությունյանը հարցը լավ է պատկերացնում, քանի որ նաեւ բնապահպանության նախարար է եղել: Նա մտահոգված է մանրաձկան ճակատագրով եւ նախարարից հետաքրքրվում էր, թե ինչո՞ւ այդ խողովակները չեն կիրառվում մեզ մոտ:
«Մի հինգ րոպե առաջ դուք բնապահպանության նախարար էիք, բայց այսօր Արամայիս Գրիգոյանի աճեցրած ձուկը գնում է այգիներ»,- ասաց պատգամավորը: «Պոմպակայանները այդպիսի մեծ ծախսեր չեն պահանջում և մենք համաձայն ենք, որ լուծումներ գտնենք: Որը էկոլոգիական տեսակետից անվտանգ է՝ ես դեմ չեմ կիրառել»,- պատգամավորին արձագանքեց Արամ Հարությունյանը`հավելելով, որ ամեն դեպքում, հարցը նախ պետք է քննարկել:
Ջրային տնտեսության պետական կոմիտեին, ի դեպ, եկող տարի կտրամադրվի 40 միլիարդ 340 միլիոն դրամ: 1 միլիարդ 840 միլիոնով ավել, քան նախորդ տարի էր տրամադրվել: Ավելացված գումարները հիմնականում կփակեն էլեկտրաէներգիայի սակագնի բարձրացած տարբերությունը:
Կարդացեք նաև
Նելլի ԳՐԻԳՈՐՅԱՆ
