Այսօր լրագրողների հետ զրույցում աշխատանքի եւ սոցիալական հարցերի նախարար Արտեմ Ասատրյանը հարցին՝ չե՞ք կարծում, որ սոցիալական լարվածություն կառաջանա, երբ չի նախատեսվում 2016-ին աշխատավարձերի, թոշակների բարձրացում՝ պատասխանեց. «2016-ի բյուջեի նախագծով արվել է հնարավոր առավելագույնը, որպեսզի բնակչության խոցելի խավերին պաշտպանվի այն բոլոր ծրագրերով, որոնք նախատեսվում են: Բյուջեի 50 տոկոսը սոցիալական նախատեսվում է առողջապահություն, կրթություն, մշակույթ ծրագրերի համար: Այս տրամաբանության ներքո ակնհայտ է, որ արվել է առավելագույնը»:
Հարցին՝ այսինքն, հաշվի առնելով առաջին անհրաժեշտության ապրանքների գնաճը եւ բյուջեի եկամուտների հավաքագրման հետ կապված խնդիրները, կարո՞ղ եք ասել, որ աղքատության մակարդակն ավելի չի բարձրանալու 2016-ին՝ նախարարը պատասխանեց. «Ընդհանրապես աղքատության մակարդակի հետ կապված յուրաքանչյուր տարի հաշվարկում եւ գնահատում է ազգային վիճծառայությունը: Ես չեմ ուզում, որ մենք գնահատականներ տանք, բայց ընդհանրապես աղքատությունը բազմագործոն երեւույթ է եւ առաջին հերթին նկատի է առնվում եկամտային ապահովվածությունը: Բնականաբար, չի կարող ազդեցություն չունենալ: Մյուս կողմից, որպեսզի ամբողջական գնահատական ունենանք, պիտի հրապարակ վիճծառայության լինեն: Բնական է, որ կյանքը ավելի դժվարանալու է հաջորդ տարում»:
Հռիփսիմե ՋԵԲԵՋՅԱՆ
