«Մոդուս վիվենդի» կենտրոնի ղեկավար Արա Պապյանի կարծիքով, Եգիպտոսում կործանված ռուսական օդանավը ահաբեկչական ակտի հետևանք է:
Նա հիշեցրեց, որ նախքան օդանավի կործանումը, ինքն արդեն կանխատեսել էր, որ Ռուսաստանի ներգրավվածությունը Սիրիայում, անպատիժ չի մնա:
«Եթե սա իսկապես տեռորիստական ակտ է, շատ ցավալի է ու իր դառը հետևանքները դեռ կարող են շարունակվել։ Սա նաև բացասական կարող է լինել Հայաստանի համար, քանի որ մենք աշխարհի կողմից ընկալվում ենք որպես Ռուսաստանի ածանցյալ»,-այսօր «Հայելի» ակումբում ասաց Արա Պապյանը:
Նրա խոսքով, Սիրիայում արդեն տեղեկություններ կան, որ ռուսները սկսել են որոշ ցամաքային գործողություններ, իսկ եթե դա իսկապես այդպես է, ուրեմն կկրկնվի 1970-ականներին Աֆղանստանի պատերազմի սցենարը, երբ Ռուսաստանը աստիճանաբար առանց նախապես պլանավորելու ընդգրկվեց լայնամասշտաբ պատերազմական գործողություններում:
Կարդացեք նաև
«Այն ամբիցիաները, որ ունի Ռուսաստանը, խանգարում է հենց իրեն։ Հիմնական խնդիրն այն է, որ Ռուսաստանը դեռևս կայսրության հոգեվարքի մեջ է։ Ռուսաստանը պետք է հասկանա, որ այլևս կայսրություն չէ՝ հզորության, ուժի առումով, լավագույն դեպքում կարող է լինել տարածաշրջանային ուժ։ Նա պետք է իր երկիրը ազատի կոռուպցիայից, ՏՏ ոլորտում հաջողությունների հասնի ու աճի։ Ռուսաստանն ուզում է խորհրդային միության դերը ստանձնել, բայց չունի այդ ուժը»:
Արփինե ՍԻՄՈՆՅԱՆ
