Ոստիկանությունում ազատամարտիկի նկատմամբ ճնշումներ չեն եղել, Ռուբեն Հայրապետյանն էլ գործով վկա էր. (Տեսանյութ)

Ավարտվել է Հայրապետյան-Հակոբյան առերես հարցաքննությունը

Արդեն տեղեկացրել ենք, որ Երեւանի ոստիկանության Կենտրոնի բաժնում ավարտվել է ֆուտբոլի ֆեդերացիայի նախագահ Ռուբեն Հայրապետյանի եւ ազատամարտիկ Սմբատ Հակոբյանի առերես հարցաքննությունը, եւ կողմերը դուրս են եկել ոստիկանական բաժնից:

Ռուբեն Հայրապետյանի՝ ոստիկանությունից դուրս գալուց մոտ 10 րոպե հետո դուրս եկավ նաեւ ազատամարտիկ Սմբատ Հակոբյանը, նա եւս, Հայրապետյանի պես, խուսափեց պատասխանել լրագրողների հարցերին:

Ազատամարտիկի փաստաբան Արմեն Խաչատրյանը խոսեց Հակոբյանի փոխարեն: Նա ասաց, որ ավել բան չի կարող հրապարակել, քանի որ գործը գտնվում է նախաքննության  փուլում: Արմեն Խաչատրյանը նշեց, որ Ռուբեն Հայրապետյանը որպես վկա է ներգրավվել գործում: Այս պահի դրությամբ, ըստ փաստաբանի, քրեական գործի ընթացքից գոհ են:

Aravot.am-ի այն հարցին՝ արդյոք առերես հարցաքննման ժամանակ ճնշումներ եղել են Հակոբյանի նկատմամբ, ազատամարտիկը պատասխանեց, որ որևէ ճնշում չի եղել: Սմբատ Հակոբյանը նաեւ հավելեց, որ վաղը ասուլիս է հրավիրելու եւ ավելի մանրամասն կներկայացնի գործի ընթացքը:

Լուսինե ԲՈՒԴԱՂՅԱՆ