Ռուսաստանի կազմի մեջ մտնող Կոմիի Հանրապետության միգրացիոն ծառայությունը, բնակության իրավունք ստանալու համար, Հայաստանի կույր խուլ եւ համր քաղաքացուն ուղարկել են ռուսաց լեզվի քննություն հանձնելու: Այս տեղեկությունը հաղորդել է «Комиинформ» գործակալությունը:
Սահմանափակ կարողություններով աղջկա մայրը՝ Գոհար Մեսրոպյանը, տեղեկացրել է, որ ընտանիքի հետ արդեն 5 տարի է ապրում է Սիկտիվկարում: Նրանց բնակության իրավունքի ժամկետը շուտով վերջանալու է եւ ընտանիքն այն երկարացնելու նպատակով փաստաթղթեր է ներկայացրել: 2015 թվականին փոփոխված միգրացիոն օրենսդրության համաձայն՝ այժմ Գոհարը, նրա ամուսինը եւ աղջիկը՝ Գայանեն, պետք է ռուսաց լեզվից, պատմությունից եւ օրենսդրությունից քննության հանձնեն, որպեսզի մնան Ռուսաստանում:
«Ինձ համար եւ ամուսնուս համար քննություն հանձնելը խնդիր չէ, բայց իմ աղջիկը ծնված օրվանից չի տեսնում եւ չի լսում: Նա առաջին կարգի հաշմանդամ է: Ես Գայանեին տարել եմ միգրացիոն ծառայություն, որպեսզի ցույց տամ, որ նա առողջական վիճակի պատճառով չի կարող քննություն հանձնել: Այնտեղ մեզ ընդունեցին եւ ասացին, որ հասկանում են մեր խնդիրը, բայց ոչինչ չեն կարող անել»,- պատմել է Գոհար Մեսրոպյանը:
Միգրացիոն ծառայությունում նաեւ ասել են, որ հաշմանդամության մասին տեղեկանքը պատճառ չէ քննությունը չհանձնելու համար: Մեսրոպյանների ընտանիքը պետք է դիմի դատարան, որպեսզի ապացուցի, որ աղջիկը ի վիճակի չէ քննություն հանձնել:
Կարդացեք նաև
«Комиинформ»-ը հավելել է, որ Ռուսաստանում արդեն հատուկ թեստեր են մշակվել կույր եւ համր միգրանտների համար: Այդ թեստերից հանել են բանավոր առաջադրանքները: Բացի այդ՝ այդպիսի խնդիրներ ունեցողների համար ավելացրել են թեստ հանձնելու ժամանակը: Գիտնականները նշել են, որ այդպիսի մարդիկ դժվար են ընկալում տեղեկատվությունը:
Պատրաստեց Աշոտ ԻՍՐԱԵԼՅԱՆԸ
