«Ձայն բազմաց, ձայն Աստծո» . ՀՀԿ-ական պատգամավոր Մկրտիչ Մինասյանն այս կարգախոսին հղում կատարեց` խոսելով սահմանադրական փոփոխությունների վերաբերյալ հանրաքվեից ակնկալվող արդյունքների մասին: «Պոստ սկրիպտում» մամուլի ակումբում ՀՀԿ-ական պատգամավորը «այո»-ի քարոզն արեց` վստահեցնելով, որ նոր կառավարման համակարգին անցնելուց հետո գործադիր, օրենսդիր և դատական համակարգերը միահեծան չեն լինելու, այլ մեկը մյուսի գործունեությունը սահմանափակելու են` օրենքի և իշխանության լծակների հավասարակշռման մեխանիզմների ապահովման արդյունքում:
Հարցին` ինչպե՞ս կմեկնաբանի ՀԱԿ խմբակցության ղեկավար Լևոն Զուրաբյանի`ՌԴ Դաշնային ժողովի Դաշնության խորհրդի նախագահ Վալենտինա Մատվիենկոյին ուղղված կոչը` «Խորհուրդ տալ ձեր ընկերներին, որ նույնքան խնայողաբար մոտենան Սահմանադրությանը, ինչպես դուք եք մոտենում ձեր Սահմանադրությանը», պարոն Մինասյանն արձագանքեց. «Ես պարտավոր չեմ ամեն ինչի գնալու պատրաստ` թեկուզ իր հայրենիքի, պետության, ժողովրդի արժանապատվության հաշվին գործողություններ ձեռնարկող մարդու գործողությունները գնահատել»:
«Ոչ»-ի ճակատի հնչեցրած քննադատություններն էլ պարոն Մինասյանն աբսուրդ բնութագրեց ու նշեց. «Ոչ»-ի ճակատի այն հիմնավորումը, թե լուծվում է հավերժ իշխանություն պահելու խնդիրը, 21-րդ դարում աբսուրդ է»:
Տաթև ՀԱՐՈՒԹՅՈՒՆՅԱՆ
