Ռուսաստանի քննչական կոմիտեն հետաքննում է Տուլայի տարածաշրջանում տեղի ունեցած ավտովթարի պատճառները: Այս տեղեկությունը «Тульская пресса»-ին փոխանցել են ՌԴ քննչական կոմիտեից:
Նշվում է, որ նախնական տվյալներով՝ Հայաստանի 44-ամյա քաղաքացի վարորդը կորցրել է ավտոբուսի կառավարումը, ինչի արդյունքում այն դուրս է եկել հանդիպակաց գոտի, հարվածել է մետաղյա արգելապատնեշին:
Դրանից հետո ավտոբուսը վերադարձել է ճանապարհ, անցել է երկու երթեւեկելի գոտիներով եւ հարվածել աջ կողմից մետաղյա արգելապատնեշին եւ շրջվել դեպի աջ: Մեքենայի վրա տեղադրված են եղել Հայաստանի Հանրապետության համարանիշներ:
«Ավտոբուսում 59 ուղեւոր է եղել: ՃՏՊ-ի արդյունքում նրանցից 5-ը տեղում մահացել են: Մի հոգի մահացել է շտապօգնության մեքենայում, մեկն էլ՝ հիվանդանոցում»,- ասել է Ռուսաստանի արդարադատության նախարարության փոխգնդապետ Զինաիդա Կամինսկայան:
Կարդացեք նաև
Նշված է նաեւ, որ վերակենդանացման բաժանմունքում եւս մեկ հոգի է մահացել եւ, այդպիսով, զոհերի թիվը հասել է ութի:
Քննչական կոմիտեն ուսումնասիրում է ՃՏՊ-ի երկու հնարավոր հետեւանքները. վարորդը քնել է ղեկի մոտ, կամ էլ ավտոբուսը տեխնիկական անսարքություն է ունեցել:
Պատրաստեց Աշոտ ԻՍՐԱԵԼՅԱՆԸ
