ԱԺ հանձնաժողովների համատեղ նիստում արդարադատության նախարար Արփինե Հովհաննիսյանը ներկայացրեց իր ոլորտի համար նախատեսված միջոցներն ու ծախսերը:
«Ես հրատարակչական եւ տեղեկատվական, տպագրական ծառայություններ ծրագրով խնդրել եմ 7 միլիոն դրամի ավելացում, խոսքը վերաբերում է «Arils» ծրագրին, որից մենք օգտվում ենք մասնավորապես սարքավորումների եւ հաքերության դեմ պայքարի մասով: ԵՏՄ անդամակցությունից հետո նկատվում է, որ շեշտակիորեն ավելացել է թարգմանչական գործը եւ այդ ծառայության համար էլ որոշակի գումար ենք խնդրում ավելացնել, քանի որ պետք է թարգմանի 26 հազար 990 էջ: Գումար ենք խնդրել նաեւ քրեակատարողական հիմնարկների պահպանման համար»,- ասաց նախարարը:
Արփինե Հովհաննիսյանն ասաց, որ այս տարի բյուջեով իրենց ավելի քիչ գումար են հատկացրել, քան 2015-ին էր:
ԱԺ պատգամավոր Էդմոն Մարուքյանը նախարարին հարցրեց. «ԴԱՀԿ-ի համար 1.4 մլրդ դրամի գումար է նախատեսված: Այդ մարմինն ունի արտաբյուջետային հաշիվ, որը խորհրդարանական վերահսկողությունից դուրս է գտնվում եւ պարզ չէ, թե այդ գումարներն ինչի վրա են ծախսում, հնարավոր չէ՞ նրանց հատկացումներից կրճատումներ անել:
Կարդացեք նաև
Արփինե Հովհաննիսյանը պատասխանեց. «Դա միակ մարմինը չէ, որ ունի արտաբյուջե»: Նա ասաց, որ կարելի է արտաբյուջեների հետ կապված վերահսկողական մեխանիզմներ սահմանել՝ օրենսդրորեն, ինչը հենց պատգամավորների գործն է:
Արփինե Հովհաննիսյանի խոսքերով՝ արտաբյուջեներից հիմնականում տրվում են հավելավճարներ, ինչ-որ թաքուն տեղերում չեն ծախսվում: Նա առաջարկեց Մարուքյանին, որ օգտվի իր՝ Տեղեկատվության ազատության մասին օրենքով սահմանված իրավունքից եւ հարցում անի, թե որտեղ եւ ինչպես է ԴԱՀԿ-ն ծախսել իր գումարները:
Հռիփսիմե ՋԵԲԵՋՅԱՆ
