Հայաստանի 2016 թվականի պետական բյուջեի նախագիծը սկսել է խորհրդարանական ճանապարհը, որի մեկնարկին վարչապետ Հովիկ Աբրահամյանը հայտարարել է, որ արտաքին տնտեսական իրավիճակը բավական մտահոգիչ է, և մարտահրավերները չեզոքացնելու համար պետք է քայլեր ձեռնարկել տնտեսական աճը խթանելու, աշխատատեղերի ստեղծման, տեղական արտադրողին օժանդակելու համար, վարել համապատասխան հարկաբյուջետային քաղաքականություն և ավելի շատ հարկել սպառումից, ոչ թե այսպես ասած՝ արտադրությունից:
Եթե այս ամենը պարզեցնենք շարքային քաղաքացու համար շատ ավելի դյուրամարս լեզվով, ապա Հովիկ Աբրահամյանի ասածը հետևյալն է. Ռուսաստանի տնտեսությունը դեռ երկար ժամանակ գտնվելու է անկումային վիճակում, նավթի գները չեն բարձրանալու, տրանսֆերտները նվազելու են, ռուսական ռուբլին չի արժևորվելու, և հետևաբար ռուսական շուկան շարունակելու է փակ մնալ հայկական արտադրողի համար, և ուրեմն պետք է մտածել, թե ինչ ենք անում այս իրավիճակից դուրս գալու համար: Այս մասին խոսող կառավարությունը ընդամենը մի քանի օր առաջ խորհրդարանական մեծամասնության միջոցով դակել տվեց մի օրինագիծ՝ վերածելով այն օրենքի, որը 2016 թվականի մայիսից նախատեսում է մի շարք թանկացումներ:
10 տոկոսով բարձրացվեց ակցիզային հարկը ծխախոտի, ոգելից խմիչքի, վառելիքի համար, և սահմանվեց ակցիզային հարկ ավտոմեքենաների լիցքավորվող գազի համար: Այդպիսով, տեղական արտադրողի համար, փաստորեն, 10 տոկոսով ավելանալու են ծխախոտի և ոգելից խմիչքի ակցիզները, այսինքն՝ այդքանով թանկանալու է ապրանքի ինքնարժեքը: Հիմա համեմատենք այդ գործողությունը Հովիկ Աբրահամյանի այն հայտարարությանը, թե պետք է օժանդակել տեղական արտադրողին:
Ինչ խոսք, հիանալի օժանդակություն է՝ բարձրացնել ակցիզային հարկը և թանկացնել ապրանքի ինքնարժեքը: Ընդ որում՝ թանկացումը, փաստորեն, կարող է կրկնակի կամ երկշերտ լինել, քանի որ վառելիքի և ավտոմեքենաների լիցքավորվող գազի ակցիզները բարձրանալով՝ բարձրանում է նաև տրանսպորտային ինքնարժեքը, իսկ դա նշանակում է արտադրողի լրացուցիչ ծախսի ռիսկ: Ակնհայտ է, որ կառավարությունը խորհրդարանի հետ միասին անում է քայլեր, որոնք տրամագծորեն հակառակ են այն ելույթներին, որ մի քանի օր հետո հնչում են խորհրդարանում բյուջեն ներկայացնելիս:
Կարդացեք նաև
Արամ Ամատունի
Հոդվածն ամբողջությամբ կարող եք կարդալ «Ժամանակ» թերթի այսօրվա համարում
