Կենտրոն եւ Նորք-Մարաշ վարչական շրջանների ընդհանուր իրավասության դատարանում, դատավոր Արմեն Բեկթաշյանի նախագահությամբ, նոյեմբերի 2-ին շարունակվում էր քաղաքագետ Սուրեն Սուրենյանցի գործի քննությունը:
Դատավարությունը սկսեց դատավորի՝ ամբաստանյալ Սուրեն Սուրենյանցին նկատողությամբ, առ այն, որ ամբաստանյալը ալկոհոլ օգտագործած է դատարան ներկայացել, որը պարզելու համար դատավոր Արմեն Բեկթաշյանը ցանկացավ շտապօգնություն կանչել՝ խմածության աստիճանը պարզելու համար: Սուրեն Սուրենյանցն արդարացավ, որ ալկոհոլ օգտագործել է նախօրեին՝ հոգեհացի ժամանակ:
Դատավարության սկզբում ամբաստանյալ Սուրեն Սուրենյանցը հրաժարվեց ցուցմունքից՝ պատճառաբանելով տուժող Նարեկ Մանուկյանի բացակայությամբ:
Ցուցմունքով հանդես եկան միայն տուժող Անուշ Աղաջանյանը եւ Ազգանուշ Մուշեղյանը՝ պնդելով, որ իրենց պահանջը նույնն է՝ ցանկանում են միայն ետ ստանալ այն ամբողջ գումարը, որը, ըստ իրենց, ամբաստանյալը խաբեությամբ յուրացրել է:
Կարդացեք նաև
Սուրեն Սուրենյանցը նախորդ դատավարության ժամանակ խոստացել էր մինչեւ հաջորդ դատավարությունը տուժողներին վերադարձնել այն բոլոր գումարները, որը տարբեր պատրվակներով յուրացրել էր:
Դատավոր Արմեն Բեկթաշյանը ամբաստանյալին հիշեցրեց իր նախորդ խոստման մասին, որին ի պատասխան՝ Սուրեն Սուրենյանցն ասաց, որ պատրաստ է ամբողջ գումարը վճարել վաղը, բացի տուժող Նարեկ Մանուկյանից:
Գործով հաջորդ դատական նիստը տեղի կունենա նոյեմբերի 19-ին:
Անուշ ՄԱԹԵՎՈՍՅԱՆ
