«Կոգալիավիա» ավիաընկերությունը, որպես շաբաթ օրը Եգիպտոսում Airbus A321 օդանավի ընկնելու միակ պատճառ է նշել արտաքին ազդեցությունը: Ըստ «Interfax»-ի՝ Մոսկվայում այսօր տեղի ունեցած բրիֆինգում լրագրողներին այս մասին ասել է ավիաընկերության ներկայացուցիչը:
«Համակարգերի խափանումը չի կարող օդում ինքնաթիռի կործանման պատճառ դառնալ: Միակ պատճառը կարող է լինել ինքնաթիռի վրա մեխանիկական ազդեցությունը»,- հայտարարել է ավիաընկերության գլխավոր տնօրենի տեղակալ Ալեքսանդր Սմիրնովը եւ հավելել, որ չկա համակարգերի խափանման այնպիսի համադրություն, որը կարող է կործանել ինքնաթիռն օդում:
Նա հստակեցրել է, որ ապահերմետիկացման դեպքում ինքնաթիռի անձնակազմը եւ ուղեւորները թթվածնային դիմակներ են հագնում. «Այդ դեպքում նաեւ օդաչուն ինքնաթիռի բարձրության վթարային իջեցում է կատարում, կարգավորում է իրավիճակը եւ, դրանից հետո, եթե անհրաժեշտ է, պահուստային օդանավակայնում վայրէջք է կատարում»:
«Կոգալիմավիայի» ղեկավարությունը նաեւ բացառել է տեխնիկական անսարքությունը եւ օդաչուների սխալը եւ հստակեցրել, որ կործանումից առաջ ինքնաթիռը անկառավարելի թռիչք է իրականացրել:
Կարդացեք նաև
Ավիաընկերության գլխավոր տնօրենի ինժեներական ապահովման հարցերով տեղակալն իր հերթին հայտարարել է, որ ինքնաթիռի անձնակազմն ի վիճակի չի եղել օգնության ազդանշան ուղարկել: «Ամենայն հավանականությամբ, վթարային իրավիճակի զարգացման սկզբում անձնակազմն ամբողջությամբ կորցրել է աշխատելու հնարավորությունը»:
Պատրաստեց Աշոտ ԻՍՐԱԵԼՅԱՆԸ
