Նոյեմբերի 2-ին ՀՀ ՏԿԱԻ նախարար Արմեն Երիցյանն ընդունեց Հայաստանում Եվրամիության պատվիրակության ղեկավար, դեսպան Պյոտր Սվիտալսկուն: Սա դեսպանի առաջին հանդիպումն էր նախարար Երիցյանի հետ:
Շնորհավորելով դեսպանին իր նշանակման կապակցությամբ՝ նախարարը մանրամասն ներկայացրեց ՏԿԱԻ գործունեությունը տարածքային կառավարման և արտակարգ իրավիճակների բնագավառում, մասնավորապես համայնքների խոշորացման ծրագրի իրականացման գործընթացը:
Շնորհակալություն հայտնելով նախարարին ջերմ ընդունելության համար՝ դեսպան Պ. Սվիտալսկին նշեց, որ ԵՄ-ն նպատակ ունի խորացնել Հայաստանի հետ իր համագործակցությունը, որի շրջանակներում վստահ է իր հունով կընթանա համագործակցությունը արտակարգ իրավիճակների բնագավառում և նոր խթան կստանա համագործակցությունը տարածքային կառավարման ուղղությամբ: Դեսպանը նշեց, որ ԵՄ-ն խորապես հետաքրքրված է Տարածքային համաչափ զարգացման ծրագրի առաջընթացով և ցանկություն ունի ավելի ակտիվ ներգրավվել ծրագրի իրականացման գործընթացում: Հայաստանում գտնվելու ընթացքում դեսպանն արդեն հասցրել է այցելել Արմավիրի և Արագածոտնի մարզեր:
Անդրադառնալով Տարածքային համաչափ զարգացման ծրագրին՝ ՏԿԱԻ նախարար Երիցյանը ներկայացրեց ծրագրում ներառված 3 հիմնական ուղղությունները (1.համայնքների խոշորացում, 2. ապակենտրոնացում, 3.համայնքների համաչափ զարգացում ) և դրանց վերաբերյալ իրականացվող ծրագրերը:
Կարդացեք նաև
«Անշուշտ, համայնքներում բավականին շատ խնդիրներ կան, որոնք մարզերի համաչափ զարգացման ծրագրի հետ միասին մշտապես ՀՀ նախագահի և վարչապետի ուշադրության կենտրոնում են»,-ասաց նախարար Երիցյանը՝ նշելով, որ ինքն անձամբ պարբերաբար այցելում է Հայաստանի տարբեր համայնքներ, զրուցում տեղի բնակիչների հետ՝ նրանց հիմնական կարիքներն ու սպասելիքները դուրսբերելու և համապատասխան լուծումներ առաջարկելու նպատակով:
Նախարարը դեսպանին ներկայացրեց նաև մանրամասներ Հայաստանի 3 մարզերում գործարկված (Սյունիք, Լոռի, Տավուշ) համայնքների խոշորացման պիլոտային ծրագրից: Ինչին ի պատասխան՝ դեսպան Սվիտալսկին նկատեց, որ իր եվրոպացի գործընկերներից շատ դրական արձագանքներ է լսել վերոնշյալ պիլոտային ծրագրի ընթացքի մասին:
ՏԿԱԻ նախարարը և դեսպանը բանավոր համաձայնություն ձեռք բերեցին տարածքային կառավարման և տարածքային համաչափ զարգացման ոլորտներում Հայաստան-ԵՄ համագործակցության ակտիվացման հարցում:
ՀՀ ՏԿԱԻՆ
